Фота з архіва Іллі Арлянскага
У расійскіх Хімках настаўніца фізкультуры справакавала напад першакласнікаў на аднагодка. Як паведаміў бацька хлопчыка выданню «Подмосковье сегодня», яго сын упаў падчас урока і настаўніца сказала:
«Сёння ў нас дзень канібала. Хто хоча чалавечага мяса? Можаце адпілаваць яму нагу!»
Пасля разбору жанчына звольнілася са школы.
Інцыдэнт адбыўся ў школе №22. Па словах Іллі Арлянскага, дзеці білі яго сына нагамі па галаве. У хлопчыка страсенне мазгоў, яго адправілі ў бальніцу ў Маскву.
Дзіцячы амбудсмэн Падмаскоўя Ксенія Мішонава напісала ў інстаграме, што хлопчык доўга завязваў шнуркі на красоўках, якія зляцелі з нагі. У ходзе разбору высветлілася, што дзеці часта чулі ад гэтай настаўніцы падобныя фразы.
Хлопчык чатыры дні знаходзіўся ў шпіталі, а цяпер з ім працуюць псіхолагі.
