Канцэрн «Белнафтахім» прыняў рашэнне часова абмежаваць экспартныя пастаўкі нафтапрадуктаў з улікам сённяшняй сітуацыі. Пра гэта заявіў сёння намеснік старшыні канцэрна «Белнафтахім» Уладзімір Сізоў на пасяджэнні аператыўнага штаба па кантролю за сітуацыяй па пастаўках нафты, якое адбылося ў ААТ «Нафтан», піша БелТА
«З улікам правядзення пасяўной кампаніі, неабходнасці забеспячэння ўнутранага рынку, наяўных рызык па перапрацоўцы сыравіны з пагаршэннем якасці намі прынята рашэнне аб часовым абмежаванні паставак нафтапрадуктаў па экспартных напрамках», — паведаміў намеснік старшыні канцэрна.
«Абмежаванне носіць часовы характар, і па меры выпраўлення сітуацыі абавязацельствы па стаўках нашым замежным контрагентам будуць выкананы», - падкрэсліў Уладзімір Сізоў.
Намеснік прэм'ер-міністра Беларусі Ігар Ляшэнка акцэнтаваў увагу на тым, што сітуацыя пад кантролем. «Паводле інфармацыі расійскага боку, сітуацыя павінна паляпшацца штосутачна», - дадаў ён.
У пасяджэнні аператыўнага штаба на чале з намеснікам прэм'ер-міністра Ігарам Ляшэнкам прынялі ўдзел прадстаўнікі канцэрна «Белнафтахім», Беларускай нафтавай кампаніі, НПЗ і ААТ «Гомельтранснафта Дружба».
