У Расіі 19 красавіка затрымалі былога мажарытарнага акцыянера банка «Югра» Аляксея Хоціна, ён змешчаны пад хатні арышт. Хоціна абвінавачваюць у крадзяжы 7,5 мільярда расійскіх рублёў (104 мільёны еўра), якія належалі ўкладальнікам ягонага ж банка.
Хоцін вёў такі закрыты лад жыцця, што яго фота з'явілася ў інтэрнэце толькі пасля затрымання. Адметна, што ў яго былі разбітыя брыво і скула пасля затрымання. Фота ТАСС.
Чым нам цікавы Хоцін? Бо ён, як і ягоны бацька Юрый, ураджэнцы Беларусі. Многія расійскія тэлеграм-каналы ўпэўненыя, што сувязь з радзімай Хоцін не губляў ніколі.
Аляксей Хоцін нарадзіўся ў 1974 годзе ў Мінску. Скончыў Мінскае сувораўскае вучылішча (1991), а таксама Расійскі эканамічны ўніверсітэт імя Пляханава (1997).
Разам з бацькам Юрыем валодалі ў Беларусі касметычным бізнэсам «Белкасмекс» у Фаніпалі, аднак сапраўдная вядомасць да іх прыйшла ў Расіі. Як піша выданне meduza.io, «Хоцін стаў заўважным найперш праз рэйдарскія захопы невялікіх прадпрыемстваў у Маскве». Хоціну належыць 1,8 мільёна квадратных метраў маскоўскай нерухомасці.
На піку паспяховасці кошт актываў Хоціна ацэньваўся ў $950 мільёнаў, ён уваходзіў у топ-100 самых паспяховых бізнэсменаў Расіі. Хоцін купляў у Сулеймана Керымава гасцініцу «Масква» з гандлёвым цэнтрам «Модная галерэя» за $500 мільёнаў. Хацеў набыць і «Уралкалій», але мала прапанаваў. Апроч нерухомасці, Хоціны валодалі таксама нафтавымі актывамі.
Яшчэ ў 2016 годзе «Ведамасці» называлі Хоціных самымі закрытымі бізнэсменамі Расіі. Яны абсалютна ніколі не давалі інтэрв’ю.
Аляксея Хоціна звязвае сяброўства з былым міністрам унутраных справаў Уладзімірам Навумавым (на фота).
Расійскія выданні адзначалі, што поспех Аляксея Хоціна грунтуецца на яго сяброўстве з былым міністрам унутраных справаў Беларусі Уладзімірам Навумавым, які пазнаёміў бізнэсмена з многімі ўплывовымі расійскімі сілавікамі, такімі як былы міністр унутраных справаў і спікер Думы Барыс Грызлоў і дзяржсакратар Рады бяспекі Мікалай Патрушаў.
«У кампаніях Хоціна адчуваецца армейская дысцыпліна і звычка да сакрэтнасці», — адзначаюць «Ведамасці».
Сярод кампаньёнаў Аляксея Хоціна вядомыя ў Беларусі людзі. Напрыклад, Віктар Лагвінец. Бізнэсмен, у дачыненні да якога ў Беларусі завялі крымінальную справу, цяпер ён з’яўляецца гендырэктарам нафтавай кампаніі «Дулісьма», якой валодае Хоцін.
Спявачка Ганна Семяновіч у майцы «Не смяшы мае іскандэры».
Аляксей Хоцін мае расійскі пашпарт. Ён асабіста спансіраваў прапагандысцкія акцыі дызайнера Анастасіі Задорынай, якая мяняла імпартнае адзенне на майкі «У труне я бачыў вашы санкцыі», «Топаль санкцый не баіцца», «Санкцыі? Не смяшыце мае іскандэры». Спансіраваў Начную хакейную лігу, створаную Пуціным.
У 2012 годзе Хоціны набылі банк «Югра», офіс якога быў у Ханты-Мансійску, у выніку за пару гадоў абарот вырас у 38 разоў. Зрэшты, тады ж банк стаў рэкардсменам па выдатках. У 2017 годзе Цэнтрабанк Расіі пабачыў махінацыі ўкладамі ў працы «Югры», але праз нейкі час за Хоціна ўступілася Генеральная пракуратура. Расійскія выданні мяркуюць, што Хоцін не з’ехаў за мяжу, бо чакаў дапамогі ад сілавога блока.
Адзін з расійскіх тэлеграм-каналаў паведамляе, што Хоцін перавозіў свае грошы наяўнымі ў Мінск, так ён нібыта перавёз каля $80 мільёнаў.
Іншыя каналы называюць Хоціна «кашальком» высокіх беларускіх чыноўнікаў. Маўляў, менавіта праз гэтага чалавека праводзіліся бізнэс-інтарэсы ў Расіі. Рэспектабельныя расійскія СМІ ўстрымліваюцца ад такіх фармулёвак. Ніякіх дакументальных доказаў фінансавых сувязяў Хоціна з беларускімі чыноўнікамі пакуль не прыводзіцца, а тэлеграм-каналы, якія пішуць пра беларускія сувязі Хоціна, не вылучаюцца высокай верагоднасцю.
