У сувязі з дэвальвацыяй нацыянальнай валюты, што адбылася ў пачатку гэтага года, аператар сотавай сувязі ЗП «Велком» прыняў рашэнне аб павышэнні тарыфаў на 18% па ўсіх тарыфных планах velcom і «Прывет» з 15 лютага 2009 года.Пра гэта паведаміла прэс‑служба кампаніі.
Зменіцца і кошт дадатковых і спецыяльных паслуг. Як тлумачаць у прэс‑службе, тарыфы павышаюцца без уліку падаткаў і акругляюцца да рубля паводле правілаў акруглення. Перадаплата пры падключэнні да velcom і кошт камплекта «Прывет» захаваецца на цяперашнім узроўні.
«Пасля дакладнага аналізу ўзрослых расходаў кампаніі мы павялічваем тарыфы толькі на 18%. Такім чынам, ЗП «Велком» бярэ на сябе частку расходаў, звязаных з аднамомантнай дэвальвацыяй курсу нацыянальнай валюты. Гэтае павышэнне дазволіць забяспечыць прадастаўленне паслуг ЗП «Велком» на ранейшым узроўні і інвеставанне ў развіццё кампаніі, яе будучыню», — гаворыцца ў паведамленні.
Зазначаецца таксама, што быў выпрацаваны «максімальна празрысты і зразумелы для абанентаў прынцып змены цэн». Механізм разліку карэкціроўкі тарыфаў апублікаваны на сайце www.velcom.by.
Паводле вынікаў трэцяга квартала 2008 года velcom паведамляў пра 3,52 млн. сваіх абанентаў.
