Фота з Facebook-аккаунта Музея-сядзібы Францішка Багушэвіча «Кушляны»
«Кушлянскі фэст» адбудзецца ў музеі-сядзібе Францішка Багушэвіча «Кушляны» 29 чэрвеня ад 12 да 17 гадзіны, паведаміла БелТА.
Ён будзе прысвечаны жыццю і творчасці паэта Францішка Багушэвіча, аднаго з бацькоў нашай літаратуры.
Пройдуць майстар-класы ад рамеснікаў і па народных танцах, экскурсіі па музеі разам з краязнаўцам, захавальнікам сядзібы Алесем Жамойціным, а таксама выступы музыкаў. Будзе квэст «Як праўду шукаюць», забаўляльныя заняткі для дзяцей і дарослых «Фэсцік: гулянні Ў народным стылі», майстар-класы па вырабе выцінанкі і лялек, паказальныя спаборніцтвы дудароў «Дударскі батл», выступленні фальклорных калектываў, будуць працаваць рамесніцкія шэрагі і палявая кухня.
А дзякуючы партнёру мерапрыемства - Нацыянальнай кінастудыі «Беларусьфільм» - пакажуць фільм «Тутэйшыя».
Лозунг фэсту - «Усім будзе чутна: ад краю да краю!»
Будзе арганізаваны аўтобус з Мінска з экскурсійным суправаджэннем краязнаўцы Валянціны Кароткінай.
