27 студзеня ў Бруселі пачаліся перамовы міністра замежных спраў Беларусі Сяргея Мартынава з чыноўнікамі структур Еўрапейскага саюза.
Мартынаў сустракаецца з кіраўнікамі знешнепалітычных ведамстваў Чэхіі, якая цяпер старшынствуе ў ЕС, і Швецыі — наступнага старшыні, а таксама з высокапастаўленымі прадстаўнікамі Еўракамісіі і Генеральнага сакратарыяту Савета ЕС. Тэма перамоў — стан і перспектывы развіцця дыялогу паміж Беларуссю і Еўрасаюзам.
Візіт праходзіць 26—28 студзеня па запрашэнні чэшскага старшынства ў Еўрасаюзе.
Напярэдадні прэс‑служба Еўракамісіі паведаміла, што на сустрэчы з Мартынавым еўракамісар па знешніх сувязях
Беніта Ферэра‑Вальднэр мае намер заклікаць Беларусь «зрабіць далейшыя крокі ў правільным кірунку, каб адносіны прадаўжалі развівацца».
У прэс‑рэлізе зазначаецца, што гэтая сустрэча Мартынава з еўрачыноўнікамі ў фармаце «тройкі» на ўзроўні міністраў замежных спраў краін ЕС — другая пасля 13 кастрычніка, калі ЕС прыняў рашэнне аб частковым прыпыненні санкцый у дачыненні да беларускіх чыноўнікаў.
На думку Ферэра‑Вальднэр, другая сустрэча — «выдатная магчымасць ацаніць прагрэс Беларусі ў галіне дэмакратызацыі, павагі правоў чалавека і вяршэнства закона». Еўракамісар нагадала, што ў красавіку санкцыі ЕС адносна Беларусі будуць перагледжаныя. «Мы будзем уважліва сачыць за сітуацыяй у краіне», — цытуе прэс‑служба Еўракамісіі Ферэра‑Вальднэр.
Камісар ЕС па знешніх сувязях выказала надзею, што Беларусь стане паўнацэннай удзельніцай Еўрапейскай палітыкі добрасуседства, а пазней — і Усходняга партнёрства. Пры гэтым яна падкрэсліла, што гэты ўдзел будзе залежаць ад «выбару краіны і яе рашэнняў».