Прэзідэнт Украіны Уладзімір Зяленскі заявіў, што формула Штайнмаера не прадугледжвае адмовы Украіны ад Данбаса і прызнання анексіі Крыма.
Пра гэта ён заявіў у сваім відэазвароце.
«Давайце разбяромся, што гэта за формула. Ці прадугледжвае яна, што Украіна прызнае анексію Крыма і адмаўляецца ад Данбаса? Не. Ці прадугледжвае яна, што выбары на Данбасе адбудуцца заўтра і пад дулам кулямётаў? Не», — сказаў кіраўнік Украіны, адзначыўшы, што тры гады таму Пятро Парашэнка заяўляў пра пачатак работы па імплементацыі гэтай формулы.
Па словах Зяленскага, гэтая формула кажа толькі адно — калі павінен запрацаваць так званы закон пра спецыяльны статус Данбаса.
«А менавіта — пасля правядзення там мясцовых выбараў, якія адбудуцца па Канстытуцыі Украіны, паводле заканадаўства Украіны і пасля публікацыі справаздачы АБСЕ пра тое, што выбары прайшлі ў адпаведнасці з міжнароднымі дэмакратычнымі стандартамі», — сказаў ён.
Нагадаем, адразу пасля ўзгаднення формулы Штайнмаера ў гарадах Украіны пракацілася хваля пратэстаў з заклікам не дапусціць капітуляцыі.
