Фота Надзеі Бужан
Адказваючы на пытанне Ганны Канапацкай пра тое, як урад па даручэнні кіраўніка краіны плануе павялічыць ВУП да 100 мільярдаў даляраў, прэм'ер-міністр прапанаваў ёй папрацаваць ва ўрадзе, піша Tut.by.
Падчас нулявога чытання бюджэту ў парламент Ганна Канапацкая пацікавілася, як плануе ўрад дасягнуць пастаўленай задачы ў 100 мільярдаў даляраў ВУП.
— Трэба прызнаць, што сёння ўрад дрэнна працуе над выкананнем гэтай задачы, — не стаў хаваць прэм'ер-міністр Сяргей Румас. — Нягледзячы на ўсе нашы намаганні, эканоміка расце не такімі тэмпамі, якія дазволяць вырашыць гэтую задачу. І абсалютна справядліва ўрад крытыкуюць іншыя дзяржаўныя органы, неабыякавыя дэпутаты, эксперты за тое, што эканоміка дрэнна расце.
Па словах Румаса, ва ўрадзе ёсць розныя сцэнары — «нават з улікам такога не вельмі добрага 2019 года, якія павінны быць тэмпы росту эканомікі, каб дасягнуць гэтай задачы».
— Сёння абсалютна відавочна, што эканоміка ў цяперашнім яе стане, традыцыйная эканоміка, не здольная генераваць такі ВУП. У наступнай пяцігодцы спатрэбіцца вялікая праца па структурных зменах для таго, каб мы стварылі новыя галіны эканомікі, якія дазволяць гэтага дасягнуць.
Сяргей Румас пачуў у пытанні Канапацкай «падтэкст, што вы ведаеце, як вырашыць гэтую задачу».
— Я так разумею, што вы, як і ўрад, таксама не вельмі добра зрабілі сваю працу па зборы подпісаў, і ў наступным парламенце не будзеце прадстаўлены, — звярнуўся прэм'ер да Канапацкай, якую не зарэгістравалі кандыдатам. — Я афіцыйна вас запрашаю на працу ва ўрад, каб вы дапамаглі нам вырашыць гэтую задачу.
Ганна Канапацкая за запрашэнне падзякавала.
— Мы тады з вамі пагаворым пра гэта асобна.
