28 лютага а 9:30 ў Палацы культуры МТЗ пройдзе ўстаноўчы з’езд Беларускай хрысціянскай дэмакратыі.Напярэдадні па ўсёй краіне прайшло 63 сходы для вылучэння сваіх дэлегатаў на з’езд. Усяго ў дакументах партыі значыцца 1057 заснавальнікаў. У працы ж з’езду будзе прымаць удзел 211 чалавек.
Паводле аднаго з сустаршыняў БХД Аляксея Шэіна, свой удзел у працы з’езду пацвердзілі госці з Галандыі, Нарвегіі, Украіны, Англіі. Будзе лідэр хрысціянскіх дэмакратаў Фінляндыі Паве Расанен. Не прыедуць Маккейн і Шварцэнегер.
З беларускіх палітыкаў будуць Аляксандр Мілінкевіч, Аляксандр Казулін, Анатоль Лябедзька, Лявон Баршчэўскі, Мікола Статкевіч, Зміцер Дашкевіч. Пасля сканчэння працы з’езду плануецца ўскладанне кветак да Архікатэдральнага касцёлу, дзе ў 1917 годзе была заснаваная Беларуская хрысціянская злучнасць. Такім чынам сённяшнія хадэкі хочуць прадэманстраваць пераемнасць пакаленняў.
Павал Севярынец зазначыў, што галоўнымі прыярытэтамі дзейнасці БХД будзе правядзенне кампаній «Моцная сям’я — моцная Беларусь», «Люблю Беларусь», пакаяння за злачынствы камунізму, аб свабодзе сумлення, супраць магіі і акультызму. Таксама БХД плануе распрацаваць сваю эканамічную платформу.
На дадзены момант ёсць тры кандыдатуры, адным з якіх з’яўляецца Віталь Рымашэўскі.На з’ездзе таксама будзе вылучаны кандыдат у прэзідэнты ад БХД.
«Партыя ствараецца не для апазіцыі, а для альтэрнатывы», — кажа Павел Севярынец. У рамках АДС хадэкі сябе не бачаць.
Сярэдні ўзрост сябра БХД складае 35,6 гадоў. «Будзем працаваць каб было 36,6», — смяецца П.Севярынец.
