Ваенкаматы вядуць прыём заяваў грамадзянаў, якія хочуць атрымаць вайсковую адукацыю... у Расіі і Казахстане. Піша Барыс Тумар.
Як зазначаецца ў абвестках, раённыя вайсковыя камісарыяты ажыццяўляюць прыём заяваў для адбору кандыдатаў з ліку цывільнай моладзі, якія хочуць паступіць у 2009 годзе ў вайсковыя навучальныя ўстановы Міністэрстваў абароны Расійскай Федэрацыі і Рэспублікі Казахстан.
Юнакоў прывабліваюць размяшчэннем ВНУ «ў сталічных і абласных гарадах з прыгожай архітэктурай, музеямі, гістарычнымі помнікамі».
Сэнс кампаніі — падрыхтаваць афіцэраў па «дэфіцытных спецыяльнасцях, па якіх падрыхтоўка кадраў у ВНУ Беларусі не праводзіцца».
Каго ж беларусы падрыхтаваць не здольныя? Аказваецца, дэфіцытныя спецыяльнасці — «радыёсувязь, радыёвяшчанне і тэлебачанне» (пры наяўнасці БДУІР і БДУ), «шматканальныя і тэлекамунікацыйныя сістэмы» (пры наяўнасці БДУІР, прычым школа фізікі і радыётэхнікі нашай краіны лічыцца адной з наймацнейшых у свеце), «пракурорска-следчая праца» (!), «прымяненне аддзелаў радыёэлектроннай выведкі», «арганізацыя ваенна-аркестравай службы і дырыжаванне аркестрамі». Сапраўды, дырыжаваць аркестрамі беларусаў толькі старэйшы брат можа навучыць.Паралельна з прышчапленнем расійскага патрыятызму.
Вядома, Казахстан тут для адмазкі. Ніхто ў стэпы вучыцца з Беларусі не паедзе. А вось на навучанне ў Расіі хтосьці паквапіцца. Хоць узровень падрыхтоўкі там зусім не сучасны.
Дарэчы, што да Казахстану. Згодна са звесткамі казахскага Мінабароны, на сёння 200 казахаў па накіраваннях вучацца ў сапраўды перадавых вайсковых школах краінаў НАТА, і толькі ў 2008 годзе, як заявіў начальнік упраўлення МА Казахстану па падрыхтоўцы кадраў Ігар Мухамедаў, колькасць казахскіх курсантаў у замежных ВНУ павялічылася на 33%.
Натуральна, што такія абвесткі з’явілася не з ініцыятывы пэўнага ваенкама. Гэта палітыка Мінска. Але ўсё адно сумна. Бо адна справа калі б беларускіх курсантаў пасылалі кудысьці атрымаць лепшыя веды. І зусім іншая — калі беларускіх хлопцаў зусім адкрыта, дый яшчэ з дапамогай быццам бы беларускіх структураў, вярбуюць суседнія дзяржавы.
