З 3 па 10 сакавіка ў Беларусі будзе працаваць місія Міжнароднага валютнага фонду (МВФ) па вывучэнні эканамічнай сітуацыі ў краіне, паведамілі БелаПАН у беларускім офісе МВФ.
Місія зоймецца вывучэннем апошніх змен у эканоміцы Беларусі. Яе прыезд пройдзе ў межах праграмы stand‑by і з’яўляецца своеасаблівым прамежкавым перад агляднай місіяй, якая плануе наведаць Мінск у канцы красавіка — пачатку мая, зазначылі ў офісе МВФ.
Групу экспертаў МВФ узначаліць Крыстафер Джарвіс — новы кіраўнік місіі па Беларусі. Раней місію МВФ па Беларусі ўзначальваў пастаянны прадстаўнік Міжнароднага валютнага фонду ў Расіі Невен Матэс.
***
Выканаўчы савет МВФ 12 студзеня 2009 года ўхваліў праграму stand‑by для Беларусі ў аб’ёме прыблізна 2,46 млрд. долараў пад рэалізацыю разлічанай на 15 месяцаў (да красавіка 2010 года) праграмы эканамічных рэформ. Першы транш крэдыту ў 788 млн. долараў ЗША пад стаўку LIBOR плюс 0,75% гадавых паступіў у Беларусь 14 студзеня, астатнія сродкі павінны пералічвацца з улікам паквартальных справаздач беларускага ўрада.
Беларусь звярнулася па атрыманне крэдыту да гэтай міжнароднай фінансавай арганізацыі ў кастрычніку 2008 года «ў мэтах павелічэння дзяржаўных золатавалютных рэзерваў і стварэння «падушкі бяспекі», неабходнай для стабільнай працы эканомікі ва ўмовах сусветнага фінансавага крызісу».
У студзені ў заяве намесніка дырэктара‑распарадчыка МВФ Такатошы Като зазначалася, што за праведзенай дэвальвацыяй нацыянальнай валюты ў Беларусі павінны прайсці найважнейшыя структурныя рэформы, у тым ліку лібералізацыя цэн і зарплаты. Запланаваныя ўрадам найважнейшыя меры ўключаюць скарачэнне мэтавага крэдытавання, дасягненне збалансаванасці бюджэту і аглядную палітыку ў сферы заработнай платы ў дзяржаўным сектары.
У прыватнасці, паводле інфармацыі МВФ, меры па бюджэтнай кансалідацыі непасрэдна скіраваныя на зніжэнне тэмпаў росту інвестыцый і спажывання. У 2009 годзе ў Беларусі павінен замарудзіцца рост зарплаты ў бюджэтнай сферы і сектары дзяржпрадпрыемстваў, будуць абмежаваныя дзяржаўныя інвестыцыі. Будуць таксама скарочаны асобныя субсідыі, але пры гэтым умацавана сістэма сацыяльнай абароны з мэтай падтрымання найбольш уразлівых слаёў насельніцтва.
У 1995 годзе МВФ спыніў выдзяленне крэдытаў Беларусі з‑за неадпаведнасці эканамічнай палітыкі ўрада рэкамендацыям фонду. У пачатку 2004 года ўрад і Нацбанк Беларусі заявілі пра адсутнасць неабходнасці ў прыцягненні крэдытных рэсурсаў МВФ. З таго часу і да канца 2008 года супрацоўніцтва з фондам было сканцэнтравана на атрыманні тэхнічнай дапамогі і кансультацый.
