У Берасцейскай абласной бібліятэцы 3 сакавіка адбылася прэзентацыя кнігі Анатоля Гладышчука «Нямцэвічы. Сапраўдныя гісторыі».
Гісторыка‑дакументальны нарыс прысвечаны роду Юліяна Урсына Нямцэвіча (1758—1841) — вядомага пісьменніка і палітыка, паплечніка Тадэвуша Касцюшкі. Радавы маёнтак Нямцэвічаў знаходзіцца ў вёсцы Скокі Берасцейскага раёна.
У кнізе 12 гісторый, звязаных паміж сабой 250‑гадовай гісторыяй гэтага славутага роду. Выданне кнігі багата ілюстраванае, утрымлівае архіўныя фотаздымкі.
У кнігу ўключаны «Успаміны часоў маіх» Юліяна Урсына Нямцэвіча на беларускай мове, якія раней у Беларусі не публікаваліся.
Аўтар кнігі — Анатоль Гладышчук, кандыдат фізіка‑матэматычных навук, загадчык кафедры фізікі Брэсцкага дзяржаўнага тэхнічнага універсітэта.
Як расказаў на прэзентацыі аўтар, ён працаваў над кнігай шэсць гадоў, пасля таго як у 2002 годзе на навуковай канферэнцыі ў Брэсце пазнаёміўся з нашчадкамі Юліяна Нямцэвіча. «Пэўную ролю адыграла і тое, што я жыву ў Скоках, дзе нарадзіўся Юліян Урсын Нямцэвіч. Маёй галоўнай задачай было вярнуць гэты беларускі род на сваю родную зямлю. Мы ведаем Юліяна Нямцэвіча як польскага паэта, польскага публіцыста і польскага палітыка і зусім мала як нашага земляка, — зазначыў А.Гладышчук. — У кнізе шмат раней не вядомых гістарычных матэрыялаў, копіі якіх мне далі ў карыстанне ў шэрагу польскіх універсітэтаў, але больш за ўсё мне дапамаглі прадстаўнікі славутага роду Нямцэвічаў, якія жывуць у Польшчы, Канадзе і Францыі».
Кніга выдадзена пры фінансавай падтрымцы Берасцейскага аблвыканкама. Яна выйшла накладам 2 тыс. асобнікаў у выдавецтве «Літаратура і мастацтва».
Таксама 3 сакавіка ў Брэсцкай абласной бібліятэцы была адкрыта кніжная выстава «Юліян Урсын Нямцэвіч — пісьменнік, публіцыст, палітык», якая прымеркавана да прэзентацыі кнігі.
