Сёння Ленінскі суд сталіцы вынес прысуд у справе збіцця рэжысёра Мікалая Купрыча. Вырак для Івана Гуляя — абмежаванне волі тэрмінам на паўтара года без накіравання ў месцы пазбаўлення волі, 5 тысячаў беларускіх рублёў за маральную шкоду і 400 рублёў — на паслугі адвакату, піша Белсат.
Паводле пацярпелага, рэжысёра і аператара дакументальнага кіно Мікалая Купрыча, яму было важна паказаць, што галоўным матывам для збіцця стала нянавісць да ЛГБТК+ супольнасці. Разам з абаронцамі — адвакатам Дзмітрыем Лепрэтарам і праваабарончай арганізацыяй «Прававая ініцыятыва» — ён доўга дабіваўся, каб следчыя прынялі гамафобію Івана Гуляя да ўвагі.
Пракурор падчас суда зазначыў, што злачынства было здзейснена на глебе нянавісці да ЛГБТК+ супольнасці і залічыў гэты факт як абцяжараныя абставіны. Падчас вочных ставак абвінавачваны Іван Гуляй прызнаваўся, што збіў Мікалая і ягоных сяброў, бо думаў, што яны геі.
— Мы прасілі самы мінімальны прысуд, які можна атрымаць па гэтым артыкуле — адзін месяц арышту. Мне хацелася даць яму ўрок. Няхай бы месяц пасядзеў, зразумеў бы можа, што больш так не рабіць, — тлумачыць Мікалай.
Паводле яго, збіўшы яго чалавек выходзіў з залі суда ў добрым настроі.
— Напэўна, ён яшчэ не зразумеў, што жыццё ў яго ўсё-ткі зменіцца на гэтыя паўтара года, — кажа пацярпелы рэжысёр.
Паводле юрысткі Галіны Харланавай з арганізацыі «Прававая ініцыятыва», якая дапамагала Купрычу, гэтую справу можна лічыць злачынствам на глебе нянавісці.
— Калі казаць простай мовай і апускаць нецэнзурныя цытаты, то абвінавачаны пытаў, ці з’яўляецца Мікалай геем. Не атрымаўшы дакладнага адказу ён перапытваў, пакуль Мікалай яму не адказаў «Ну няхай я буду геем». Гэтага выразу было дастаткова, каб збіць яго, — кажа яна.
Мікалай Купрыч быў збіты ў ноч з 24 на 25 жніўня на вуліцы Кастрычніцкай у Менску. Да яго падышоў невядомы чалавек і збіў. Тады мужчына знаходзіўся разам з сябрамі, нападнік агрэсіўна запытаўся: «Ты пі..ар?». У выніку канфлікту Купрыч атрымаў чэрапна-мазгавую траўму і пералом носа.