Пры прызначэнні Ігара Кудрэвіча дырэктарам Дэпартамента па гуманітарнай дзейнасці Кіраўніцтва справамі прэзідэнта Аляксандр Лукашэнка расказаў, «што мора фондаў падтрымліваюць апазіцыю», і як грошы для апазіцыі «чамаданамі спрабуюць завезці ў Беларусь». Словы прыводзіць яго прэс-служба.
У найбліжэйшы час плануецца падкарэктаваць працу Дэпартамента па гуманітарнай дзейнасці. Аляксандр Лукашэнка растлумачыў, што гэта будзе зроблена ў сілу другой прычыны, чаму ён замкнуў на сабе працу гэтай структуры.
«Мы не маглі адмовіцца ад гуманітарнай дапамогі з-за мяжы: мы чарнобыльская рэспубліка — і чарнобыльцам дапамагалі, і дзеткам. Потым гэтая гуманітарная дапамога пашырылася на спартсменаў, людзей з абмежаванымі магчымасцямі і гэтак далей.
Але што я заўважыў гадоў дваццаць таму, можа, нават больш: гуманітарнай дзейнасцю ў нас больш за ўсё займалася апазіцыя. І яны на працягу аднаго года сталі багатымі. Яны тут хадзілі па вуліцах, гвалтам крычалі.
Адкуль грошы? Сталі вывучаць: ваў, ды гэта ж гуманітарная дапамога! І тады я ўзяў пад кантроль гэтае пытанне — калі гуманітарная дапамога накіроўваецца ў краіну чарнобыльцам, яна павінна дайсці да чарнобыльцаў. І такую гуманітарную дапамогу мы вызвалялі ад падаткаў», — адзначыў ён.
«Калі грошы прыходзяць у краіну на фінансаванне палітычнай дзейнасці, то гэта ўжо не можа лічыцца гуманітарнай дапамогай, — звярнуў увагу кіраўнік дзяржавы. — І гэтыя сродкі не могуць вызваляцца ад падаткаў».
«Падтрымка апазіцыі і іх палітычнай дзейнасці — калі ласка, фондаў мора. Амерыканскіх, у Германіі: Эберта, Адэнаўэра і гэтак далей. Яны павінны і аказваюць дапамогу, праўда, заўсёды непразрыста: яна ідзе праз Польшчу, Літву, чамаданамі спрабуюць завезці грошы ў Беларусь. Мы гэта спынілі. Але галоўнае, як бачыш, нашы некаторыя «свядомыя» грамадзяне сталі багатымі 20-25 гадоў таму назад. Таму прыйшлося ўзяць пад кантроль гуманітарную дзейнасць, каб вызваленая ад падаткаў яна дайшла да спажыўца, менавіта да тых, каму з Захаду ці Усходу прызначана па дакументах. І дэпартамент тут адыграў вельмі сур'ёзную ролю», — падкрэсліў Аляксандр Лукашэнка.
