Краіны Балтыі абавязаліся падпісаць дэкларацыю аб намерах не купляць электраэнергію з Астравецкай АЭС, паведамляе прэс-служба літоўскага прэм'ера.
«Мы рады, што набліжаемся да агульнай пазіцыі балтыйскіх дзяржаў не купляць электраэнергію з небяспечнай АЭС «Астравец». Імпарт расійскай электраэнергіі не павінен стаць магчымасцю для імпарту з АЭС «Астравец». Я таксама не сумняваюся, што разам з Латвіяй, Эстоніяй і Еўракамісіяй мы знойдзем рашэнне адносна належнага кантролю за паходжаннем электраэнергіі, якая паступае ў нашы сеткі з трэціх краін», — сказаў прэм'ер-міністр Літвы Саўлюс Скверняліс.
Паводле яго слоў, краіны Балтыі імкнуцца да далейшага развіцця агульнага рынку прыроднага газу ў рэгіёне, улічваючы стратэгічнае значэнне тэрмінала звадкаванага прыроднага газу, які паспяхова працуе на працягу 5 гадоў у Клайпедзе для дзяржаў і спажыўцоў.
