Іранец Парса зладзіў у інстаграме анлайн проста з бальніцы, падчас якога расказаў свае навіны.
У палаце іранец знаходзіцца адзін, у палаце па суседстве — яго дзяўчына са сваёй сястрой. Вынік іх аналізаў — адмоўны.
Бацькі Парсы таксама прайшлі абследванне ў іранскай клініцы.
«Я не захварэў у Іране, дома я быў цэлы месяц. Каб вірус падхапіў там, мае бацькі таксама б захварэлі. А яны здаровыя. Я не веру, што ў мяне каранавірус», — кажа іранец.
Парса расказаў, што два разы на дзень яму даюць таблеткі, зрабілі флюараграфію.
Сёння са словамі падтрымкі яму тэлефанавалі з іранскай амбасады.
«Папраўлюся, разам пакурым кальян, толькі з рознымі мундштукамі», — сказаў пад канец эфіру іранец.
Пасля Парса памераў сабе тэмпературу. Градуснік паказаў 36,79.
27 лютага ў Беларусі пацвердзілі першы выпадак заражэння вірусам COVID-19. Вірус выявілі ў студэнта БНТУ, грамадзяніна Ірана, які прыбыў у Мінск з Баку 22 лютага.
Яго і асоб, якія зь ім кантактавалі, змясцілі ў закрытыя боксы Мінскай інфекцыйнай бальніцы.
Міністэрства аховы здароўя Беларусі расказала пра стан сваякоў дзяўчыны студэнта з Ірана, у якога выяўлены каранавірус. Падазрэнне на каранавірус ёсць у бацькі.
«Бацька знаходзіцца пад падазрэннем, — распавяла прэс-сакратарка Міністэрства аховы здароўя Юлія Барадун. — Клінічнай карціны няма, але адзін з тэстаў даў сумнеўны вынік. Лабараторныя дадзеныя зараз пераправяраць. Гэтак жа, як і ў яго сваякоў — у найбліжэйшыя суткі. Ні ў каго з шпіталізаваных цяпер клінічных праяў няма».
Юлія Барадун паведаміла, што тэмпература ў бацькі дзяўчыны вечарам назіралася 36,2, скаргаў няма.
Першым пра каранавірус у бацькі дзяўчыны расказаў у жывым эфіры са шпіталя сам іранец. Ён спаслаўся на словы медсясцёр з бальніцы.
Інстаграм-відэачат з ім зладзілі яго аднагрупнікі з Беларускага нацыянальнага тэхнічнага ўніверсітэта, якія знаходзяцца на каранціне ў шпіталі ветэранаў вайны.
Сам іранец пачуваецца добра, кажа, што не мае тэмпературы. Але ў часе жывога стрыму праз інстаграм ён трохі кашляў. Ён тлумачыць гэта сваёй астмай і прастудай.
Іранец знаходзіцца ў палаце адзін. Ён і яго аднакурснікі паведамілі, што ў інфекцыйную бальніцу змясцілі таксама тых студэнтаў БНТУ, якія кантактавалі з іранцам і ў якіх выявілі павышаную тэмпературу.
Нагадаем, што першага ў Беларусі носьбіта каранавіруса выявілі 28 лютага. Гэта студэнт БНТУ з Ірана, які вярнуўся з радзімы 22 лютага. Ягоных аднагрупнікаў, выкладчыкаў і медперсанал 33-й паліклінікі, з якім ён кантактаваў, адправілі на каранцін у спецыяльна прыстасаваны для гэтага шпіталь ветэранаў вайны імя Машэрава.
