17 чэрвеня падчас распаўсюду ўлётак з заклікам да негвалтоўнага супраціву затрыманыя актывісты новапаўсталай групы «Бунт» Кацярына Казак, Алена Казак, Аляксей Панасік, Дзяніс Дзянісаў, Тацяна Елавая, Іван Сьпірын, Вераніка Носань. Затрыманых трымалі да паўночы ў пастарунку (выпусьцілі толькі Дзянісава). Сьпірыну выставілі абвінавачаньні ў непадпарадкаваньні супрацоўнікам міліцыі (ён спрабаваў зьбегчы пры затрыманьні), астатніх уначы вывезьлі ў Воршу й пасадзілі ў менскую электрычку, бо – жыхары Менску. 19 чэрвеня Сьпірыну прысудзілі 15 сутак арышту.
Некалькі актывістаў засталіся ў Віцебску чакаць суду над Сьпірыным. Позна ўвечары трох зь іх – Тацяну Дзядок, Ільлю Шыманскага і Міхаіла Шубача затрымалі, калі яны пайшлі ў краму купляць прадукты на вячэру. Іх пратрымалі 3 гадзіны ў аддзеле міліцыі Віцебскага раёну й адпусьцілі без пратаколаў.
Пасьля паўночы ў арандаваную актывістамі кватэру ўварваліся міліцыянты і, заявіўшы, што суседзі скардзяцца на шум, пачалі аглядаць асабістыя рэчы прысутных. Пад гаўбцом знайшлі пакет з улёткамі, прыпісалі яго Мікіту Абраменку й забралі хлопца для складаньня пратаколу. Чакаючы сябра, моладзь сьпісала 10 старонак «Кнігі скаргаў і прапановаў» пратэстамі супраць несправядлівых дзеяньняў міліцыянтаў. Абраменку адпусьцілі, але за гэты час у пастарунак прывезьлі І.Бурыкіна і Яўгена Папковіча, якіх затрымалі за наяўнасьць балёнчыкаў з фарбай: напярэдадні ўначы ў Віцебску зьявіліся графіці «Бунт».
18 чэрвеня на адной з асьвятляльных вежаў летняга амфітэатру Крысьціна Шацікава ўзьняла нацыянальны сьцяг. Міліцыянты здымалі яе некалькі гадзінаў, выклікаўшы для гэтага нават 3 машыны МНС. Шацікава пацярпела падчас здыманьня, у пастарунку ёй стала дрэнна, і міліцыянты завезьлі яе сьпярша ў шпіталь хуткай дапамогі, а потым у абласную клініку.
Зьняты й скінуты міліцыянтам сьцяг падняла Тацяна Севярынец, маці палітвязьня Паўла Севярынца, якая выпадкова апынулася побач. За гэта міліцыянты зьвінавацілі яе ў тым, што хацела зьнішчыць важны рэчавы доказ. Жанчыну разам з Шацікавай і фотакарэспандэнтам недзяржаўнай газэты «Віцебскі кур’ер-М» Сержуком Серабром (ён фатаграфаваў усе падзеі) завезьлі ў Кастрычніцкі РУУС Віцебску. С.Серабра зьвінавацілі ў хуліганстве й прысудзілі штраф у 0,5 б.в. Фатаздымкі ў памяці ягонага фотаапарату былі сьцёртыя міліцыянтамі.
19 чэрвеня К.Шацікаву за «несанкцыяваны пікет», хуліганства ў грамадзкім месцы і непадпарадкаваньне работнікам міліцыі судзьдзя Кастрычніцкага суду Валянціна Міхасёва аштрафавала на 150 б.в., пасьля чаго асуджаную зноў павезьлі ў РУУС па «зноў адкрытых акалічнасьцях справы». Яе завезьлі на псыхіятрычную экспэртызу, потым дапыталі, а 20 чэрвеня вывезьлі ў Воршу й пасадзілі ў менскую электрычку. У Чыгуначным судзе Віцебску ў гэты ж час Сяргея Шабанава і Я.Папковіча асудзілі на 1 б.в. кожнага за «дробнае хуліганства», а І.Бурыкіна прызналі невінаватым, але пасьля суду таксама затрымалі. Разам зь імі затрымалі й Дз.Дзянісава, які прысутнічаў на судзе.
