Тыдзень таму сацыяльныя сеткі абляцела абразлівае відэа пра беларускую мову, якое запісала Іна Кардабнёва з аграгарадка Ціманава пад Клімавічамі. У ім педагог абуралася, што яе сыну даводзіцца вучыць у школе гэты «нікому непатрэбны прадмет», а пасля дзеці з глыбінкі пакутуюць ад «калгаснага акцэнту».
Іна Кардабнёва. Фота з сацыяльных сетак.
Відэа набрала больш за 30 тысяч праглядаў і як мінімум 6 тысяч дызлайкаў. Праз некалькі дзён яно было выдалена.
Чытайце. «Дзіця не запамінае гэтых дэбільных словаў». Педагог з-пад Клімавічаў запісала абуральнае ВІДЭА пра беларускую мову
Кіраўніцтва Клімавіцкай дзіцяча-юнацкай спартыўнай школы выклікалі на размову ў райвыканкам.
«Наша Ніва» даведалася, чым скончылася справа.
«Адміністрацыя школы дэпрэміравала педагога. Па судовых разбіральніцтвах пакуль яшчэ няма выніку. На педагога было некалькі заяў — як вусных, так і дасланых па інтэрнэце», — расказаў загадчык сектара спорту і турызму Клімавіцкага райвыканкама Равіль Сабіраў.
З красавіка Іна Кардабнёва ўжо не працуе ў школе, бо сышла ў водпуск па доглядзе за дзіцем.
Равіль Сабіраў дадаў, што выказванні на тым відэа — не пазіцыя школы, а пазіцыя канкрэтнага чалавека.
«Трэба паважаць сваю мову», — падсумаваў ён.
Цікава, што праз некалькі дзён пасля скандалу ў клімавіцкай раёнцы выйшаў артыкул пра ўплыў роднай мовы на чалавека. Сярод тых, хто выказаўся, быў дырэктар Ціманаўскай сярэдняй школы і першы сакратар раённага БРСМ.
