Рыгор Азаронак на дзяржаўным тэлеканале СТВ заявіў, што «танец каранабесія» і «хваля інфармацыйнай пандэміі» за некалькі тыдняў паставілі крыж на «так званай глабалізацыі», якая ішла трыццаць гадоў з часу распаду СССР.
«Каму выгадна?» — задаецца пытаннем Азаронак. І адказвае: глабалізацыя мусіла зрабіць сусветным лідарам ЗША, а выйграў Кітай. Таму глабалізацыю Захад і вырашыў спыніць.
Азаронак працытаваў публікацыю «Ленты.ру» за 2015 год пра «паспяховы лабараторны эксперымент па стварэнні гібрыднай формы каранавіруса кажаноў». А таксама словы сакратара Савета бяспекі РФ Мікалая Патрушава пра «асаблівую трывогу» з нагоды размяшчэння Злучанымі Штатамі біялабараторый па ўсім свеце, сказаныя «яшчэ год таму».
«Трэба вымавіць словы, за якія сёння тут жа абвесцяць вар'ятам», — кажа Азаронак. І вымаўляе: «Біялагічная зброя».
«Расія нядаўна прапанавала змагацца з пандэміяй усёй грамадой, — кажа Азаронак. — Адмяніць санкцыі і абмежаванні, аб'яднаць намаганні. Не далі…»
Па словах Азаронка, адзін з нямногіх, хто не схіліўся перад сусветным ціскам, хто «захоўвае мужнасць, волю і характар», — гэта кіраўнік беларускай дзяржавы.
«За Беларуссю зараз сочаць ва ўсім свеце. І зайздросцяць», — упэўнівае Азаронак.
«Прыйшоў час даказаць, што Беларусь — не істэрычная паненка-падлетак, што схавала твар пад маскай, а гордая рэспубліка-партызанка. Наперадзе — юбілей Перамогі, сустрэнем яго годна. Гнём сваю лінію».
Чытайце таксама: Памятаеце прапагандыста Азаронка з 1990-х? Цяпер яго сын падрос і пляжыць апазіцыю ў эфіры СТБ
