У нядзелю 17 мая на плошчы Леніна ў Брэсце прайшло традыцыйнае кармленне галубоў у знак пратэсту супраць акумулятарнага завода, які пабудаваны за некалькі кіламетраў ад горада. Паводле інфармацыі брэсцкага праваабаронцы Рамана Кісляка, у гэты раз на плошчы сабралася каля 120 чалавек, паведамляе Брэсцкая газета.
Акцыя пратэсту зноў прайшла без лозунгаў. Хутчэй за ўсё, на гэта паўплывалі масавыя затрыманні актывістаў і велізарныя штрафы. На мінулым тыдні шасцярых праціўнікаў акумулятарнага завода і двух праваабаронцаў ужо аштрафавалі на 360 базавых (9 720 рублёў), і гэта яшчэ не канец. На наступным тыдні яшчэ адбудуцца суды над Раманам Кісляком і актывістам Валерам Фамінскім (абодва цяпер на волі) і праціўнікам завода Паўлам Кінчаком, які быў затрыманы днём 16 мая ў пункце пропуску «Казловічы» пасля праходжання мяжы і цяпер чакае суда ў ІЧУ.
Таксама 16 мая на ўжо аштрафаванага актывіста Віталя Казака склалі пратакол па артыкуле 23.4. КаАП «Непадпарадкаванне супрацоўнікам міліцыі» пры яго затрыманні 8 мая.
Паводле Кісляка, за апошні час акрамя Кінчанка, Казака і яго самога былі затрыманыя Сяргей Пятрухін, Канстанцін Астапук, Уладзімір Мароз, Дзяніс Малышэнка, Алег Вялаў, Валерый Фамінскі, Уладзімір Вялічкін. Аляксандра Кабанава фармальна не затрымалі, бо ён захварэў і знаходзіцца ў бальніцы. Але каля дзвярэй яго палаты выставілі ахову з двух міліцыянераў. Кісляк таксама ўдакладніў, што ў яго на гэты момант 2 пратаколы: за 12 красавіка і 3 мая.
Акрамя таго, 14 мая ў будынку суда была азнаёмленая з пратаколам аб адміністрацыйным правапарушэнні Людміла Карчэўская, яе не затрымлівалі. Справа ў дачыненні да яе будзе разглядацца 18 мая.
З улікам сутак да суда, велізарных штрафаў і таго, што большасць актывістаў пасля судоў везлі ў ІЧУ зноў, гэта самая жорсткая хваля ціску на іх за больш чым два гады пратэстаў супраць акумулятарнага завода. На платформе MolaMola 14 мая стартаваў збор сродкаў у падтрымку актывістаў.
Затрыманні і судовыя працэсы сталі асноўнай тэмай абмеркавання ўдзельнікаў акцыі пратэсту.
«Людзі абураныя, але, нягледзячы на рэпрэсіі, маюць намер дамагацца канчатковага закрыцця акумулятарнага завода», — пракаментаваў сітуацыю «БГ» Кісляк.
Пасля маўклівай акцыі пратэсту людзі пайшлі па цэнтральных вуліцах Брэста да кінатэатра «Беларусь». Аб затрыманнях не паведамляецца.
