Фота Надзеі Бужан
Міністэрства аховы здароўя Літвы зацвердзіла спіс 45 краін, у якіх за апошнія 14 дзён узровень захворвання на каранавірус (COVID-19) быў вышэйшы за 25 выпадкаў на 100 000 жыхароў. Гэты спіс будзе абнаўляцца кожны тыдзень. Яго будзе аб'яўляць Міністэрства аховы здароўя, піша Delfi.lt.
У спісе ў асноўным не краіны Еўрасаюза і Еўрапейскай эканамічнай зоны. Людзі, якія вярнуліся з гэтых краін у Літву, павінны 14 дзён правесці ў самаізаляцыі. Акрамя таго, яны на працягу 48 гадзін павінны зарэгістравацца ў Нацыянальным цэнтры грамадскай аховы здароўя, падаць свае даныя спецыялістам.
Замежнікі з гэтых краін у Літву могуць прыехаць толькі ў выключным выпадку. Тыя, хто атрымае дазвол на прыезд, павінны 14 дзён правесці ў ізаляцыі.
У спіс уваходзяць такія краіны, як Афганістан, Аргенціна, Арменія, Азербайджан, Бразілія, ЗША, Ірак, Джыбуці, ААЭ, Іран, Гандурас.
З еўрапейскіх краін гэта Андора, Сан-Марына, Малдова, Гібралтар, Паўночная Македонія, Партугалія, Швецыя і, безумоўна, Беларусь, дзе 119 выпадкаў на 100 тысяч жыхароў за апошнія 14 дзён.