Ці адмяняецца турызм у гэтым сезоне? Так, сапраўды, цяпер лепей не з'яўляцца ў шматлюдных турыстычных месцах праз працяг пандэміі. Але хіба нельга арганізаваць адпачынак так, каб рызыка заражэння была зведзена да мінімуму? Майстэрня роварных экскурсій «Менскі велашпацыр» сцвярджае, што гэта магчыма, і прапануе чытачам «Нашай Нівы» годны адпачынак у выходныя дні і буднія вечары гэтага напружанага ва ўсіх сэнсах лета.
Прафесійныя велагіды адмыслова адабралі і перабудавалі некаторыя са сваіх маршрутаў так, каб яны, з аднаго боку, вырывалі змучанага гараджаніна з абрыдлай каранціннай клеткі, а з іншага — захоўвалі эпідэміялагічную бяспеку ўдзельнікаў экскурсій. Падчас прапанаваных, збольшага, загарадных вандровак можна будзе нарэшце размяць ногі і пакруціць педалі ўдосталь, дыхаючы водарам лясных ды палявых сцежак. А яшчэ — наведаць знакавыя для айчыннай гісторыі мясціны і музеі пад адкрытым небам.
Ужо ў гэтую пятніцу, 3 ліпеня, у дзень вызвалення Мінска, адбудзецца першая такая вандроўка, у якой плануецца наведаць вельмі атмасферны і малавядомы музей-дачу Васіля Быкава, падыхаць брызам на беразе Мінскага мора, дакрануцца да старажытнай скарбніцы Заслаўя.
Таксама ў ліпені адбудзецца вандроўка ў Раўбічы з наведваннем музея авіяцыйнай тэхнікі па дарозе. Будзе вандроўка ў гістарычнае прадмесце Каралішчавічы пад Мінскам. Будзе няспешная экскурсійная прагулка па ўсёй агромністай тэрыторыі канцлагера «Трасцянец».
А кагосьці прывабіць магчымасць дакрануцца да вытокаў менскай гісторыі — перакрочыць раку Менку, пагуляць па абарончых валах легендарнага гарадзішча і пракаціцца па ўсіх трох сектарах нашага адзінага аўтэнтычнага музея-скансэна ў Азярцы. На замову «Менскага велашпацыра» ў музеі будзе праведзена велаэкскурсія, якая знаёміць цікаўных са скарбамі беларускага драўлянага дойлідства ў значна больш дынамічным тэмпе, чым пешая экскурсія.
У мэтах бяспекі і дзеля прыемнасці язды амаль усе маршруты пракладзены ў зялёнай зоне ці па зручных веласцежках.
Добры бонус у многіх маршрутах — наяўнасць вадаёмаў, прыдатных для купання, а таксама пляжных і пікніковых стаянак для падсілкавання. Увогуле, тэмп усіх экскурсіі, як кажуць раварысты, «матрасны»: асаблівай фізічнай падрыхтоўкі не патрабуецца, а па дарозе запланавана шмат прыпынкаў.
Якія яшчэ захады робяць арганізатары вандровак, каб удзельнікі пачуваліся бяспечна?
Па-першае, колькасць чалавек у групе не будзе перавышаць шасці. Па-другое, усе ўдзельнікі экскурсіі перад пачаткам будуць азнаёмлены не толькі з агульнымі правіламі бяспечнай язды, але і з правіламі эпідэміялагічнай бяспекі падчас экскурсій. На стаянках раварысты будуць абавязаныя выконваць правіла сацыяльнай дыстанцыі, а ў тыя рэдкія моманты, калі групе трэба будзе ненадоўга ўвайсці ў памяшканне — удзельнікам будзе прадастаўлена аднаразовая маска для абавязковага выкарыстання.
Удзельнікі ж з відавочнымі сімптомамі рэспіраторна-вірусных захворванняў дапускацца да экскурсій не будуць.
Фота Вадзіма Літвінава
Для тых жа, каму не пад сілу выбрацца далёка за горад, «Менскі велашпацыр» запланаваў серыю лёгкіх і прыемных дзвюхгадзінных паездак па рамантычных алеях Лошыцкага парку — з намерам паказаць раварыстам усе самыя цікавыя і гістарычна важныя яго закуткі, якія цяжкавата абыйсці ў звычайнай пешай экскурсіі.
Каб пазбегнуць шматлюднасці, лошыцкія экскурсіі запланаваны на буднія вечары.
Удзел у гэтай экскурсіі можна браць таксама на электрасамакатах і іншых сродках персанальнай мабільнасці.
Фота Вадзіма Літвінава
Калі вы не маеце ўласнага ровара, арганізатары абяцаюць паклапаціцца аб пракатным. А яшчэ — абяцаюць зніжку для тых, хто пацярпеў ад штрафаў і «сутак» за акцыі салідарнасці ў гэтым годзе.
З поўным раскладам і апісаннем найбліжэйшых велаэкскурсій «Менскага велашпацыра» можна пазнаёміцца на сайце mienskbiketour.by, у фэйсбуку, Укантакце і ў інстаграме. А той, хто ўжо гатовы адправіцца ў дарогу па летнія ўражанні, — можа адразу запісвацца ў групу па тэлефоне +375297040018.
Зычым усім добрага адпачынку і моцнага здароўя перад гістарычным жнівом!
Фота — з папярэдніх экскурсій «Менскага велашпацыра».
