Пасол Беларусі ў Расіі прагназуе, што граніца паміж Беларуссю і Расіяй, закрытая расійскім бокам у сакавіку з-за пандэміі COVID-19, будзе зноў адкрыта ў канцы ліпеня — пачатку жніўня. Аб гэтым дыпламат сказаў сёння, адказваючы на пытанне карэспандэнта БелТА.
Фота БелТА.
«Аналізуючы сітуацыю кожны дзень, суадносіны колькасці тых, хто захварэў і хто выздаравеў, бачу выдатную дынаміку непасрэдна па Маскве, дзе захварэлых у суткі 600-700 чалавек, а тых, хто паправіўся, — 2-3 тыс., — адзначыў Уладзімір Сямашка. — І па Расіі колькасць тых, хто выздараўлівае, штосутачна большая, чым тых, хто захварэў. Па Беларусі такая ж сітуацыя. Думаю, што граніца недзе да канца ліпеня — пачатку жніўня павінна быць адкрыта».
Пасол адзначыў, што расійскі бок ужо ўвёў некаторыя паслабленні па перасячэнні граніцы. Ён нагадаў, што з самага пачатку для бесперабойнага забеспячэння таварамі першай неабходнасці не ўводзілася забарона на перасячэнне граніцы паміж Беларуссю і Расіяй для грузавога транспарту. А нядаўна ўрад Расіі прыняў распараджэнне, якое дазваляе перамяшчацца праз беларуска-расійскую граніцу вахтавікам. У прыватнасці, паводле слоў пасла, гэтай магчымасцю ўжо скарысталіся спецыялісты прадпрыемства «Беларуснафта».
«І наадварот, на будаўніцтве БелАЭС ідзе пастаянная ратацыя кадраў, і мы знаходзім спосабы для таго, каб яны праходзілі каранцін і траплялі на станцыю», — паведаміў Уладзімір Сямашка.
Ён дадаў, што дагэтуль пасольства вымушана займацца перапраўкай у Беларусь грамадзян, якія прыбываюць у расійскія аэрапорты з трэціх краін вывазнымі рэйсамі. Гэтых грамадзян беларуская дыпмісія на ўласных аўтамабілях дастаўляе з маскоўскіх аэрапортаў да расійска-беларускай граніцы. У прыватнасці, сёння дыпмісія аказвае дапамогу ў дастаўцы на радзіму васьмі беларускім грамадзянам.
