Фота з сайта «Прэсбола»
Вядомы беларускі гандбаліст Андрэй Клімавец, які пражывае ў Нямеччыне і працуе там трэнерам, распавёў пра тое, што сочыць за падзеямі ў Беларусі напярэдадні прэзідэнцкіх выбараў, піша Tribuna.com.
— За перадвыбарным палітычным жыццём на радзіме сочыце?
— Безумоўна. Стараюся быць у курсе ўсіх падзей, чытаю інфармацыйныя сайты.
— І што пры гэтым думаеце?
— Напэўна, час нешта мяняць. Лічу, Беларусь саспела для зменаў. Правяду аналогію са спортам. Не ведаю ніводнага трэнера, які паспяхова кіраваў бы камандай больш за дзесяць гадоў.
І калі ў камандзе нелады, то перш за ўсё мяняюць трэнера, а не ўсю каманду, — сказаў Клімавец.
У сярэдзіне «нулявых» Клімавец стаў грамадзянінам Нямеччыны і ў 2007-м у яе складзе зборнай выйграў чэмпіянат свету. Па завяршэнні кар'еры гульца Андрэй Клімавец трэніраваў «Пфорцхайм» з трэцяй лігі.
Узяўшы ў 2019-м гадавы перапынак, ён зноў узначаліў каманду з зямлі Бадэн-Вюртэмберг у пачатку гэтага года.