Мітынг у падтрымку Ціханоўскай у парку Дружбы Народаў 30 ліпеня сабраў амаль 70 тысяч чалавек.
Кандыдат у прэзідэнты Святлана Ціханоўская не будзе адмаўляцца ад правядзення агітацыйнага мітынгу ў парку Дружбы народаў 6 жніўня, нягледзячы на мерапрыемства, якое ў гэты ж час у парку хоча правесці адміністрацыя Савецкага раёна, піша Tut.by.
Нагадаем, што 3 жніўня стала вядома, што адміністрацыя Савецкага раёна правядзе 6 жніўня ў парку Дружбы народаў, з 17.00 да 21.30, святочнае мерапрыемства, прысвечанае Дню чыгуначных войскаў: у парку выступяць ганаровая варта, ваенны аркестр. Яшчэ там будзе выстава ваеннай тэхнікі, спецыяльныя прызы ад Мінабароны і выступленне Аляксандра Саладухі і Жанет. У гэты ж час на гэтай пляцоўцы правесці свой мітынг-канцэрт збіралася кандыдат у прэзідэнты Святлана Ціханоўская.
Ціханоўская падавала заяўку на гэтую пляцоўку яшчэ 14 ліпеня, першай.
4 жніўня давераная асоба кандыдата ў прэзідэнты Святланы Ціханоўскай Вольга Кавалькова падала ў ЦВК і Мінгарвыканкам скаргу на рашэнне горада праводзіць на пляцоўках, выдзеленых для перадвыбарнай агітацыі, святочныя і гарадскія мерапрыемствы. Акрамя таго, Кавалькова, перадаючы скаргу, папрасіла Мінгарвыканкам запрасіць яе на сустрэчу, каб вырашыць пытанне правядзення агітацыйных мітынгаў.
Ні адказу на скаргу, ні запрашэння ў Мінгарвыканкам на перамовы штаб Ціханоўскай так і не атрымаў.
— Ніякага ліста ад уладаў аб тым, што мы не можам праводзіць мітынг 6 жніўня ў парку Дружбы народаў, ні Святлана, ні я не атрымлівалі. Мы падалі ўчора скаргу ў Мінгарвыканкам, але адказу і рэакцыі няма да гэтага часу, таму мы рухаемся па свайму плану: мітынг у парку Дружбы народаў будзе, — кажа давераная асоба кандыдата Вольга Кавалькова.
Прынцып падачы заяўкі ад кандыдата ў прэзідэнты падчас выбарчай кампаніі паведамляльны: кандыдат проста паведамляе Мінгарвыканкам пра дату, час і месца правядзення мітынгу на дазволеных горадам пляцоўках. Ціханоўская ў дзень рэгістрацыі яе кандыдатам 14 ліпеня апавясціла гарадскія ўлады, што 6 і 8 жніўня, з 8.00 да 22.00, будзе праводзіць у парку Дружбы народаў агітацыйныя мітынгі.
