Фота Надзеі Бужан
Аляксандр Лукашэнка прызначыў Уладзіміра Караніка, які да гэтага часу кіраваў Міністэрствам аховы здароўя, на пасаду губернатара Гродзенскай вобласці. Кандыдатуру ён прапанаваў у часе сустрэчы ў Гродна з дэпутатамі абласнога савета.
«Для мяне гэта вялікая страта. Таму што гэта геройскі чалавек у часы каранавірусу. Калі б не ён, нам было б вельмі цяжка. Гэта быў першы памочнік прэзідэнта па ўсіх пытаннях, першы генерал, які выконваў мае ўказанні. І мы правільна паступілі», — сказаў Лукашэнка.
Раней пасаду займаў Уладзімір Краўцоў.
Уладзімір Каранік нарадзіўся ў 1973 годзе ў Гродне. У 1996 годзе скончыў Гродзенскі дзяржаўны медыцынскі інстытут.
З 1996 па 2011 год працаваў на розных пасадах у Рэспубліканскім навукова-практычным цэнтры анкалогіі і медыцынскай радыялогіі імя Аляксандрава. Быў лекарам-стажорам, малодшым навуковым супрацоўнікам, навуковым супрацоўнікам аддзялення таракальнай анкапаталогіі, загадчыкам аддзялення таракальнай хірургіі РНПЦ.
З 2011 года да прызначэння міністрам аховы здароўя ў 2019-м займаў пасаду галоўнага доктара Мінскага гарадскога клінічнага анкалагічнага дыспансера.
