У нядзелю 23 жніўня ў Мінску пад бел-чырвона-белымі сцягамі прайшоў шматтысячны Марш новай Беларусі. Сотні тысяч беларусаў сабраліся ля плошчы Незалежнасці і рушылі вялікай калонай да Стэлы, а пасля — да плошчы Дзяржаўнага Сцяга, што за Палацам Незалежнасці.

Паколькі праспект Пераможцаў загарадзіў АМАП, не даўшы людзям стаць на плошчы Дзяржаўнага Сцяга, пратэстоўцы развярнуліся і пачалі разыходзіцца. У гэты момант у свой палац пад прыцэламі тэлекамер прыляцеў Аляксандр Лукашэнка з аўтаматам — выразная дэманстрацыя сваёй гатоўнасці ісці да канца. Яго пасланне дысаніравала з агульнай святочнай атмасферай.

На вуліцы Мінска выйшла вельмі розная публіка: быў і сярэдні клас, і рабочыя, і госці з рэгіёнаў. 

Панавала атмасфера карнавалу і ўздыму. Мінчукі віталі шэсце сцягамі з балконаў і дахаў. Жанглёр цырка дэманстраваў сваё майстэрства пад апладысменты. Былі барабаны, людзі ў крэатыўных касцюмах і тысячы плакатаў, а таксама шыльды з назвамі сваіх прадпрыемстваў і населеных пунктаў.

А калі ўлады з мэтай псіхалагічнага ўздзеяння ўключылі гучнамоўнікі з савецкімі песнямі, народ жыва падпяваў «Первым делом самолеты»: «Первым делом, первым делом Лукашенко, а Ермошина, Ермошина потом».

Сёння людзям не дазволілі падысці да Стэлы, якая стала эмацыйным цэнтрам пратэсту тыдзень таму. Улады выставілі шчыльны кардон з аўтаматамі ў якасці дэманстрацыі сілы. Байцы трохі збянтэжана назіралі за сотнямі тысяч людзей, што ішлі, і ішлі, і ішлі побач, са сцягамі і кветкамі. Жыхары дома насупраць Стэлы вывесілі два гіганцкія нацыянальныя сцягі.

Калеснікава, Кавалькова, Латушка і Дылеўскі сёння на мітынгу агучылі патрабаванні Каардынацыйнай рады. Гэта адстаўка міністра ўнутраных спраў, абвяшчэнне новых выбараў, а таксама ініцыяванне адклікання дэпутатаў усіх узроўняў, калі яны не асудзяць гвалт і фальсіфікацыі.

Пакуль невядома ні пра адзін інцыдэнт падчас маршу, дэманстранты паводзілі сябе выключна мірна.

20:00

Ад Стэлы арганізавана адвялі салдат унутраных войск. Агароджа з калючага дроту пакуль застаецца.

19:59

На вуліцы Леніна людзі сышлі з праезнай часткі і рознымі шляхамі пайшлі ў бок плошчы Незалежнасці. АМАП таксама грузіцца ў свой транспарт. Рух па вуліцы Леніна ад перакрыжавання з Інтэрнацыянальнай пакуль яшчэ перакрыты.

19:47

Купкі дэманстрантаў паціху разыходзяцца.

19:35

Калона дэманстрантаў дайшла да перакрыжавання праспекта Пераможцаў і Інтэрнацыянальнай (на плошчы Перамогі). На праспект Незалежнасці іх не прапускаюць шарэнгі спецназу. Нехта збочвае на Нямігу, нехта на Зыбіцкую. Калона радзее.

19:06

Верталёт з чырвона-зялёным арнаментам прыляцеў з цэнтра горада, праляцеў над дэманстрантамі і пачаў кружыць над рэзідэнцыяй, сеў. 

Пул першага пазней паведаміў, што ў верталёце прыляцеў сам Лукашэнка. Прычым выйшаў з верталёта ў бронекамізэльцы з аўтаматам, але без магазіна.

19:03

Тым часам у Маскве каля беларускага пасольства затрымалі сама меней 11 чалавек. Там таксама адбывалася акцыя салідарнасці з беларусамі.

18:50

Натоўп разварочваецца, ідзе ў бок Нямігі. На развітанне крычаць: «Кожны дзень».

Тым часам пачаліся праблемы з мабільным інтэрнетам.

18:41

Супрацьстаянне працягваецца. Адлегласць захоўваецца.

18:40

Ля рэзідэнцыі Лукашэнкі напружана, паведамляе Свабода. Людзі падыходзяць да ланцуга АМАПа, яны крычаць салдатам: «Апусці шчыты, ты даваў прысягу»!

18:26

Адглегласць ад ачаплення да дэманстрантаў складае некалькі дзясяткаў метраў. 

Фота «Чай з малінавым варэннем»

18:17

Каля Палаца Незалежнасці стаяць штурмавыя комплексы «Рубеж», з дапамогай якіх разганялі пратэсты ў ноч з 9 на 10 жніўня.

18:16

Машыны з мігалкамі, на іх стаіць спецназ.

18:05

Людзі ідуць ад стэлы да Палаца Незалежнасці. Дзясяткі тысяч. Дарога ля Палаца перакрыта некалькімі кардонамі, вайсковая тэхніка з сіне-чырвонымі мігалкамі.

Не даходзячы да БелЭкспа, праспект Пераможцаў перакрылі сілавікі.

17:55

Ад вуліцы Валадарскага да стэлы паехалі 10-15 аўтобусаў і мікрааўтобусаў, а таксама 4 аўтазакі, піша Tut.by

Каля стэлы людзі паволі падыходзяць усё бліжэй да сілавікоў. Адны ўдзельнікі акцыі стрымліваюць іншых, каб не падыходзілі занадта блізка. З калонак па-ранейшаму гучаць заклікі разысціся.

Тым часам былі заўважаныя салдаты са снайперскімі вінтоўкамі СВД і гранатамётам РПГ-7.

Каля стэлы ў 17:16. Tut.by

17:45

На праспекце Пераможцаў, непадалёк ад стэлы прайшоў невялікі мітынг, выступілі Калеснікава, Кавалькова, Латушка і Дылеўскі. Яны агучылі патрабаванні Каардынацыйнай рады: адстаўка міністра ўнутраных спраў, абвяшчэнне новых выбараў, а таксама ініцыяваць адкліканне дэпутатаў усіх узроўняў, калі яны не асудзяць гвалт і фальсіфікацыі.

З дынамікаў перыядычна даносіцца: разыходзьцеся, не вымушайце прымяняць фізічную сілу і спецсродкі.

Паміж заклікамі ўключаюць савецкія песні.

17:20

Цяпер людзі стаяць на схілах каля гасцініцы «Планета» і на праспекце Пераможцаў, на бок стэлы пераходзіць не спрабуюць. Стэла ачэпленая некалькімі радамі сілавікоў, часам яны групамі перамяшчаюцца ўнутры ачэпленага перыметра. З гучнагаварыцеляў даносяцца просьбы разысціся, людзі рэагуюць на гэта крыкамі «Фу!».

17:04

Дзясяткі тысяч каля Стэлы. Усё ачэплена, каля 1000 сілавікоў, усе ў касках, агароджана. Адны вайскоўцы ў камуфляжы, іншыя ў форме. Прыйшлі Калеснікава і Кавалькова, просяць адысці на адваротны бок і не лезці, валанцёры адгарадзіліся.

Калеснікава, Кавалькова, Латушка, Максім Знак і Сяргей Дылеўскі (МТЗ) вырашаюць, што рабіць далей.

У кожнага вайскоўца ў ачапленні за спінай - аўтамат Калашнікава.

17:00

Каля ГУМа людзей сагналі з праезнай часткі, цяпер яны ідуць па ходніках. Па праспекце пусцілі рух.

Станцыі метро «Плошча Леніна», «Кастрычніцкая» і «Плошча Перамогі» адкрылі для пасадкі і высадкі пасажыраў.

17:26

У Гомелі пратэстоўцы зрабілі вялікае кола — прайшлі праз праспект Леніна, звярнулі на праспект Перамогі і зноў выйшлі на Савецкую. Цяпер ідуць да плошчы Леніна. Калона расцягнулася на некалькі кіламетраў.

 16:50

У напрамку Стэлы па праспекце Машэрава ідуць тысячы людзей.

16:45

Будматэрыялы ў арцы на Леніна.

16:40

Дзясяткі юнакоў са сцягамі залезлі на дах дома на праспекце.

16:30

Частка людзей ідзе па праспекце Пераможцаў. Галава прайшла «Галерэю» і наблізілася да «Планеты». Дзясяткі тысяч у калоне. Там ужо стаяць вайскоўцы.

Хвост — каля Чырвонага касцёла.

Частка пайшла ад плошчы Перамогі да Якуба Коласа.

16:27

У Магілёве на плошчы Славы сабралася блізу чатырох тысяч удзельнікаў маршу «За новую Беларусь», піша Свабода.

Апошні раз на найстарэйшым пляцы апазіцыйна настроеныя гараджане збіраліся ў 1996 годзе — на «Чарнобыльскім шляху». У далейшым плошча станавілася месцам правядзення афіцыйных імпрэзаў. Цяпер пратэстоўцы разышліся па плошчы. Частка ўдзельнічае ў мітынгу, які праводзяць прыхільнікі Святланы Ціханоўскай.

16:24

Людзі працягваюць гуляць па праспекце Незалежнасці. Частка пайшла ў бок праспекта Пераможцаў, шмат людзей ля цырка, частка гуляе па Кастрычніцкай. А хвост калоны яшчэ на самой плошчы Незалежнасці.

16:20

Каля Стэлы паставілі калючы дрот і агароджы. На праспекце людзі скандуюць «Трыбунал» і «Караева ў турму».

16:11

У гандлёвым цэнтры «Галерэя», які знаходзіцца ў пачатку праспекта Пераможцаў, толькі што абвясцілі пра экстранае закрыццё.

16:06

16:06

Каля тысячы чалавек сабраліся каля СІЗА №1 на вуліцы Валадарскага ў Мінску, паведамляе карэспандэнт Свабоды. Яны занялі ходнікі і праезную частку вуліцы, крычаць хорам насупраць муроў турмы: «Выпускай!» Непадалёк стаяць дзве машыны з АМАПам, інцыдэнтаў няма.

16:00

Людзі проста гуляюць па праспекце. Вялікая калона ідзе ў бок Кастрычніцкай плошчы.

15:49

Вось, што распавёў «Нашай Ніве» рабочы МТЗ.

«Ёсць перашкода для масавай забастоўкі: многія жывуць у інтэрнатах, нас палохаюць звальненнем, а гэта значыць, што страціцца і інтэрнат. Палохаюць пазбаўленнем прэмій таксама. Таму я не думаю, што маштабная забастоўка ўсё ж адбудзецца, але мы верым у сілу мірных пратэстаў. Гісторыя ўжо паказвала, што яны ўрэшце прыводзяць да перамен. Дзе тыдзень, там два, там месяц, галоўнае не спыняцца і ісці да канца».

15:48

Акцыі праходзяць і ў рэгіёнах. У Гомелі каля тэатра сабраліся некалькі тысяч чалавек. У Брэсце дэманстранты сабраліся на плошчы Леніна. У Магілёве людзі пачалі збірацца на праспекце Міру каля аблвыканкама. У Віцебску людзі пайшлі шэсцем па вуліцы Леніна. 

15:39

Людзі працягваюць сцягвацца на праспект.

15:31

Праспект перакрыты па плошчы Перамогі, натоўпы, колькі відаць, ідуць у бок плошчы Незалежнасці.

15:23

Людзі скандуюць: «Трыбунал» і «Адпускай». «Не забудзем, не даруем». І канечне — «Жыве Беларусь!»

Людзі ідуць з Раманаўскай слабады

15:12

Адзін з папулярных лозунгаў: «Сабачку, сабачку» (імітацыя пад «За бацьку» на афіцыйным мітынгу).

15:11

15:08

На плошчы Незалежнасці грае саўндтрэк з «17 імгненняў вясны». Бярэ за душу.

Фота Алеся Пашкевіча

14:57

На плошчы Незалежнасці ўлады ўключылі дынамікі, з якіх папярэджваюць, што грамадзяне парушаюць заканадаўства, а таксама песню «В городском саду» ў выкананні Кабзона.

14:52

На праспекце Незалежнасці — дзясяткі тысяч людзей. Людзі гукаюць: «Не забудзем, не даруем».

14:47

Па Кальварыйскай з двух бакоў ідуць групы людзей, сотнямі, загорнутыя ў бчб сцягі.

14:45

Дэманстранты перакрылі праспект Незалежнасці на плошчы Незалежнасці. Рух перакрыты.

Пакуль больш за 10 тысяч. 

14:43

Людзей на плошчы так шмат, што падысці з боку праспекта немагчыма, людзі стаяць на праспекце, бо няма як уперад рухацца. ДАІ праспект перакрываць пакуль не хоча, таму па праезнай частцы рухацца не выпадае.

14:41

14:35

Аўтазакі на Валадарскага.

14:33

Ля плошчы Перамогі калона пратэстоўцаў, якія ідуць да плошчы Незалежнасці, не канчаецца ўжо 25 хвілін.

14:31

Прыйшла калона медыкаў, акцёры Купалаўскага. 

14:30

Праход з боку БДПУ на Плошчу Незалежнасці перакрыты. Таму людзі ад Інстытута культуры спрабуюць прайсці на плошчу праз вуліцу Мяснікова.

14:27

На плошчы Незалежнасці людзі скандуюць: «Сыходзь». Машыны няспынна сігналяць.

14:26

У Брэсце і Віцебску сабралася па некалькі сотняў людзей.

За парадкам у Брэсце на месцы дэманстрацыі сочаць былыя вайскоўцы 38-й брыгады. Дэсантнікі з былым камбрыгам Валерыем Сахашчыкам прыйшлі на плошчу са сцягамі ПДВ. Іх з'яўленне людзі сустрэлі апладысментамі.

14:25

14:23

14:22

У Гродне на Савецкай плошчы сабралася на Марш салідарнасці каля 2 тысяч, гэта рабочыя заводаў у працоўнай форме. Міліцыя папярэджвае ў гукаўзмацняльнік, што мерапрыемства несанкцыянаванае, у адказ дэманстранты пляскаюць у ладкі і скандуюць «Жыве Беларусь», «Сыходзь», «Свабоду».

Затым каля трох тысяч рушылі з Савецкай плошчы на плошчу Леніна кароткім шляхам, праз Савецкую вуліцу. Скандуюць «Трыбунал», «Забойцы», «Ганьба». 

14:15

На плошчы Незалежнасці некалькі тысяч. 

14:14

Па Леніна на праспект рушаць сотні людзей.

14:13

14:06

Калона з Інстытута культуры злучылася з некалькімі сотнямі чалавек ля Акадэміі кіравання пры Прэзідэнце. Зараз у калоне больш за тысячу чалавек. Яны рухаюцца ў бок плошчы Незалежнасці.

Падобна, што людзей з Маскоўскай не прапускаюць. 

13:57

Работнікі МТЗ аб'ядналіся з калонай калег, якая ідзе ад МЗКЦ і МАЗа ля прахадной трактарнага завода. Далей калона рушыла па Даўгабродскай у бок Мотавелазавода.

13:55

На будынку Мінгарвыканкама ўключыўся гучнагаварыцель: ён заклікае тых, хто сабраўся на плошчы Незалежнасці, разысціся. І папярэджвае аб адказнасці. 

13:53

13:48

На праспекце Незалежнасці, асноўных праспектах горада, плошчы Незалежнасці атмасфера мірная і святочная. Усюды ідуць калоны ці цякуць патокі людзей са сцягамі і плакатамі. А вось каля Стэлы на праспекце Пераможцаў выстаўлена ачапленне. 

13:40

Кальварыйская вуліца.

13:35

Паток людзей цячэ ў цэнтр каля Мотавела на Партызанскім праспекце. 

Людзі на плошчы Якуба Коласа зліваюцца ў суцэльны паток. 

13:25

Калоны МЗКЦ і МТЗ не сустрэліся. Калона МЗКЦ не стала чакаць рабочых з Трактарнага завода. 

13:23

На трасах Маладзечна — Мінск, Гродна — Мінск і іншых — гіганцкія хвасты машын, якія едуць у Мінск, рух запаволены. ДАІ перакрыла адну з палос, правяряюць машыны выбарачна. 

13:18

Калона ідзе па праспекце Дзяржынскага

13:10

Плошча Незалежнасці і праспект Незалежнасці па стане на 13:00 не перакрытыя, праезд свабодны, паведамляе карэспандэнт «Нашай Нівы».

Аднак закрытыя станцыі метро «Плошча Леніна», «Кастрычніцкая», «Купалаўская» і «плошча Перамогі».

***

Машыны з сілавікамі, якія ад 9 жніўня штодзень прыязджаюць на дзяжурства ў цэнтр, сёння стаяць на вуліцах Савецкай, Камсамольскай, Валадарскай, Берсана, Свярдлова, каля стадыёна «Дынама».

АНТ паведаміла, што ў Мінску адменены пралукашэнкаўскі аўтапрабег.

Па Партызанскім праспекце ідзе невялікая калона рабочых з МЗКЦ. На Трактарным іх чакае калона з некалькіх дзясяткаў чалавек з МТЗ пад бел-чырвона-белымі сцягамі.

Да МТЗ прыехала група шахцёраў Беларуськалія. 

Хочаш падзяліцца важнай інфармацыяй ананімна і канфідэнцыйна?