У Гродне на Марш герояў прыйшло 3—5 тысяч чалавек. Пратэст скончыўся жорсткімі затрыманнямі, піша Свабода.
Пратэстоўцы зь бел-чырвона-белымі сьцягамі сабраліся на Савецкай вуліцы каля моладзевага цэнтрe «Гродна» каля 14:00. Яны сталі ў вялікае кола і скандавалі: «Верым, можам, пераможам», «Жыве Беларусь», «Гэта наш горад», «Горадня, выходзь». Некаторыя прыйшлі на марш з сабачкамі, кветкамі, плякатамі, у адзеньні белага і чырвонага колераў.
![](http://nashaniva.com/img/w732d4webp1/photos/z_2020_09/b1224cef-30bb-4217-8c1a-7a780fb127a1_w1023_r0_s-ecv1d.jpg.webp)
Адтуль калёна рушыла ў бок вуліцы Горкага празь Вялікую Траецкую вуліцу. На яе чале ішлі людзі ў працоўнай форме прадпрыемства «Хімвалакно», мужчына з абразом Маці Божай. Аўтамабілі спыніліся і прапускалі пратэстоўцаў, пакуль тыя пераходзілі праз дарогу. Аўтамабільны рух на Вялікай Траецкай на пэўны час спыніўся. Кіроўцы сыгналілі пратэстоўцам, у тым ліку з машын хуткай дапамогі.
![](http://nashaniva.com/img/w732d4webp1/photos/z_2020_09/5f6015ce-003e-4bcd-9e8e-76a8a0b8d487_w1023_r0_s-1q4ha.jpg.webp)
Калёна дайшла да Грандзіцкага рынку, яе галава перайшла праз дарогу і павярнулася ісьці ў цэнтар. Да стадыёну «Нёман» пад’ехалі аўтазакі. Каб у іх ня трапіць, дэманстранты перабеглі на другі бок вуліцы.
Урэшце аўтазакі пад’ехалі да абодвух бакоў вуліцы Горкага. Выйшла каля сотні амапаўцаў, міліцыянтаў, вайсковых спэцназаўцаў, многія ў шлемах, са зброяй, якая страляе гумовымі кулямі. У пэўны момант выйшла калёна вайскоўцаў і, рытмічна б’ючы ў шчыты, пайшла ў бок пратэстоўцаў.
![](http://nashaniva.com/img/w732d4webp1/photos/z_2020_09/48446573-9696-4bfc-b658-6ae4eca26fe4_w1023_r0_s-c9elk.jpg.webp)
Спачатку затрымлівалі людзей у хвасьце калёны. Калі тыя сышлі ў двары, іх жорстка выхоплівалі адтуль. Паводле інфармацыі Андрэя Мялешкі, затрымалі не менш за 102 чалавекі, дакладная лічба невядомая.
![](http://nashaniva.com/img/w732d4webp1/photos/z_2020_09/7a838174-50c1-4831-828d-1a0cabace541_w1023_r0_s-nscam.jpg.webp)
![](http://nashaniva.com/img/w732d4webp1/photos/z_2020_09/76babdc0-8b7a-4079-a7ec-84d557369359_w1023_r0_s-nvicy.jpg.webp)
![](http://nashaniva.com/img/w732d4webp1/photos/z_2020_09/0c29f7e2-2d2c-43c0-999a-eeba0410028a_w1023_r0_s-8evey.jpg.webp)
Затрыманых павезьлі ў Ленінскі РАУС. Да райаддзелу міліцыі ў гэты час прыяжджала хуткая дапамога. Блізкія затрыманых расказалі, што чулі, як тыя ў будынку РАУС сьпявалі і спрачаліся зь міліцыянтамі.
Каментары