«Я навучылася прафесіі і даведалася, як працаваць нельга. Лічу за лепшае жыць з расплюшчанымі вачыма. Беларусы заслугоўваюць ведаць праўду, як і заслугоўваюць жыць у абсалютна іншай, лепшай версіі сваёй краіны», — напісала сёння ў сваім інстаграме журналістка Агенцтва тэлевізійных навін БТ Аляксандра Кавеліч. І звольнілася. 

Аляксандра ішла да гэтага больш за месяц — сябры нават прапаноўвалі скінуцца і плаціць ёй грашовую дапамогу, пакуль яна не знойдзе новую работу. 

Фота са старонкі ў Інстаграм

Чаму з БТ працягваюць сыходзіць людзі? Пра гэта дзяўчына расказала «Нашай Ніве». 

«На БТ я працавала з 2017 года. Дарога на экран была цяжкай: доўга стажыравалася, потым была рэдактарам і спецыяльным карэспандэнтам. 

Мая работа не была звязана з асвятленнем палітыкі, перадусім я расказвала пра Мінск і Мінскую вобласць, пра людзей таленавітых і адкрытых, пра якіх хочацца расказаць.

Але ў жніўні ўжо немагчыма было сыходзіць ад палітычных тэм: пачалі з'яўляцца задачы зрабіць матэрыялы ў падтрымку «палітыкі кампаніі», а што гэта за «палітыка» — усе разумеюць.

Прыходзіш на работу — атрымліваеш даручэнне, адмаўляцца некарэктна, ты павінен гэтага зрабіць.

На мяне паўплываў матэрыял пра датэрміновае галасаванне.

Быў вельмі спецыфічны ўчастак, «экспертаў» нават не трэба было апытваць — гатовыя відэа мне ўжо прадаставілі калегі, гэта ўсё было пададзена як паўсюдная карціна, хаця сама я разумела, што нават тыя нешматлікія людзі, якія з намі гаварылі на ўчастку, прыйшлі туды, бо іх «папрасілі». 

Ужо ў сярэдзіне жніўня накіпела, калектыў задаваў пытанні: чаму мы павінны падаваць інфармацыю аднабока, перакручваць? Гэта я асабіста таксама пытала ў начальства, але ніякага адказу не атрымала, адказ адзін: калі вам не падабаецца — вы ведаеце, што рабіць. 

Пры гэтым на тэлебачанні шмат класных журналістаў, але ёсць ідэалагічная верная кагорта, якая вызначае палітыку кампаніі, дае пэўныя ўказанні, як усё павінна быць. 

І я вырашыла звольніцца. Спачатку пайшла ў адпачынак, каб абдумаць усё, а потым звольнілася. Мне прыкра ад таго, што робіцца на тэлевізары: як падаюцца навіны? Гэта недапушчальна, гэта непавага да гледача, які чакае сумленнай інфармацыі. 

Калі чалавек глядзіць толькі дзяржаўныя навіны, не мае крытычнага мыслення, то ён становіцца закладнікам аднабокай, няправільнай і несумленнай карціны свету, я не магла больш у гэтым удзельнічаць», — сказала Аляксандра. 

Па яе словах, з АТН сышло каля 20 чалавек — гэта журналісты і аператары. 

Агульную колькасць людзей разам з тэхнічным персаналам яна ацэньвае як «больш за сотню». 

Далей дзяўчына збіраецца паспрабаваць сябе ў ІТ. 

Хочаш падзяліцца важнай інфармацыяй ананімна і канфідэнцыйна?