Яшчэ напрыканцы жніўня генеральная пракуратура абвясціла, што пад яе эгідай створаная Міжведамасная камісія, якая возьме на сябе вывучэнне скаргаў людзей, якіх збівалі і з якіх здзекаваліся сілавікі. Ужо два месяцы прайшло з дня выбараў, але пра вынікі дзейнасці камісіі зусім нічога не вядома.
Невядома, колькі разоў яна збіралася, да якіх высноў прыйшла, нават да апошняга часу не было вядома, хто яе ўзначальвае. У каментары «НН» дэпутат Палаты прадстаўнікоў Аляксандр Дубаў толькі сказаў, што гэта адзін з намеснікаў генеральнага пракурора.
У самой Генпракуратуры называць імя кіраўніка камісіі наадрэз адмовіліся. «Няважна, хто з’яўляецца кіраўніком», — адказвалі ў прэс-службе.
Даведацца, хто ж узначальвае гэтую камісію, атрымалася з адказу дэпутаткі Палаты прадстаўнікоў, які яна даслала віцяблянцы Ірыне Барысевіч. Жанчыну затрымлівалі 12 жніўня падчас акцыі салідарнасці.
Ад Аўтуховай прыйшоў такі адказ: «Калі маюць месца быць факты перавышэння службовых паўнамоцтваў сілавых ведамстваў, то грамадзяне маюць права звярнуцца ў рэспубліканскую міжведамасную камісію, якую ўзначальвае намеснік генеральнага пракурора Дзмітрый Гара. Вашы довады аб тым, што ў Беларусі не выконваюцца законы, неабгрунтаваныя».
Дзмітрый Гара стаў намеснікам генеральнага пракурора 30 снежня 2019 года. Яму 50 гадоў, родам з Тбілісі (Грузія). Вучыўся на правазнаўстве ў Вайсковым Красназнамённым інстытуце Мінабароны ў Маскве. Ад 1993 года працаваў следчым у КДБ. У 2009 стаў начальнікам следчага ўпраўлення КДБ.
Каментары