Звярнулі ўвагу «пакеты» ўзнагароджаных. Напачатку названыя Міхаіл Мясніковіч і Наталля Качанава. Першы ўзнагароджаны ордэнам Айчыны ІІ ступені. Другая атрымала з рук Аляксандра Лукашэнкі ордэн Айчыны ІІІ ступені.
Ордэн Айчыны ІІІ ступені атрымаў і адзін з «губернатараў», вельмі нядаўна прызначаны — кіраўнік Гродзенскай вобласці Уладзімір Каранік.
Раней ён быў міністрам аховы здароўя. Старшыня Нацыянальнага статыстычнага камітэта Іна Мядзведзева і міністр аховы здароўя Дзмітрый Піневіч удастоены ордэна Пашаны.
Варта адзначыць, што Белстат у 2020 годзе ўпершыню ў сваёй гісторыі засакрэціў статыстыку смяротнасці ў краіне. Беларусь — адзіная еўрапейская краіна, якая так зрабіла.
Акрамя таго, узнагароды ніжэйшага рангу атрымала вялікая група прапагандыстаў радыкальнага толку. Медалём «За адвагу» ўзнагароджаны спецыяльны карэспандэнт тэлеканала СТБ Рыгор Азаронак, медалём «За працоўныя заслугі» — аглядальнік аддзела выдавецкага дома «Беларусь сегодня» Андрэй Мукавозчык і галоўны саветнік прэс-службы Прэзідэнта Валерый Шульга, медалём Францыска Скарыны — рэдактар аддзела выдавецкага дома «Беларусь сегодня» Дзмітрый Крат і спецыяльны карэспандэнт тэлеканала АНТ Ігар Тур.
Акрамя іх, узнагароды атрымала група артыстаў, якая адзначылася ўдзелам у аўтапрабегах за Аляксандра Лукашэнку, канцэртах у яго падтрымку і барацьбе з беларускай нацыянальнай сімволікай.
