ААТ «Гродзенскі мясакамбінат» першым у Беларусі атрымала ліцэнзію на вытворчасць медавухі — для рэстарана ва ўласным турыстычным комплексе «Гарадзенскі маёнтак» (Каробчыцы, Гродзенскі раён).
Як паведаміў журналістам генеральны дырэктар прадпрыемства Анатоль Грышук, у месяц плануецца выпускаць 2-3 тоны прадукцыі. Яна атрымліваецца метадам халоднага зброджвання мёду, вады і інгрэдыентаў. У меню рэстарана таксама ёсць стравы з дзікіх жывёл, здабытых на паляванні.
Паводле інфармацыі гендырэктара, будаўніцтва аграрна-турыстычнага комплексу было распачата ў 2004 годзе. Цэнтр стылізаваны пад панскі маёнтак XVII ст. з коннаспартыўным клубам. Ён размешчаны за 12 км ад цэнтра Гродна і займае 18 га зямлі з вялікімі і малымі сажалкамі, вальерамі для свойскіх і дзікіх жывёл.
Паводле слоў А.Грышука, месца прызначана для сямейнага адпачынку. 1 чэрвеня адбылося дабрачыннае свята для дзяцей, у якім узялі ўдзел больш як 500 чалавек. На выходныя цэнтр наведваюць 2.000 турыстаў з Беларусі і замежжа, штодзённая выручка складае каля 20 млн. рублёў. 4 чэрвеня цэнтр прымае паслоў еўрапейскіх краін, акрэдытаваных у Літве.
У хуткім часе тут плануецца пабудаваць кафэ з дзіцячым меню, дзіцячую гульнявую пляцоўку, шэсць гасцявых домікаў, кузню, крыты манеж для правядзення конных аўкцыёнаў і спартыўных спаборніцтваў.
