БелТА
Пра гэта сёння ішла размова на нарадзе па пытаннях развіцця айчыннай мотавелатэхнікі, піша БелТА.
Лукашэнка нагадаў, што вытворчасць першай айчыннай мота- і велапрадукцыі пачалася ў 1945 годзе і перажыла распад Савецкага Саюза. «У апошнія гады ва ўсім свеце сфарміравалася велізарнае запатрабаванне на здаровы лад жыцця, а спартыўная актыўнасць стала папулярнай як ніколі. Але ці тое яшчэ будзе. Сусветны рынак велатэхнікі расце хуткімі тэмпамі, і, нягледзячы на пандэмію, прагнозы сведчаць аб яго штогадовым павелічэнні на 9 працэнтаў», — адзначыў ён
Лукашэнка канстатаваў, што такім чынам склаліся лепшыя ўмовы для развіцця вытворчасці ў гэтай сферы. У Беларусі захавана вытворчасць вела- і мотапрадукцыі айчынных гандлёвых марак «Аіст» і «Мінск», асвоена больш за сотню новых мадэляў веласіпедаў і дзясяткі мадэляў мотатэхнікі.
«Але, на жаль, фінансава-эканамічныя паказчыкі, мякка кажучы, не радуюць. І доля беларускіх веласіпедаў на ўнутраным рынку зніжаецца з года ў год і складае сёння прыкладна пятую частку», — сказаў ён.
Па яго словах, і экспарт слабы, не вырашае праблему продажаў.
«Гэта нядзіўна, калі згублена ключавое звяно вытворчасці — уласнае канструктарскае бюро. Для таго каб арганізаваць нейкую зборку, розуму шмат не трэба. Але гэта шлях амаль тупіковы. І праблемы прадпрыемства, займаючыся зборкай, не вырашыць. Асабліва фінансава-эканамічныя. Ды і даўгавую праблему не ўдаецца вырашыць. Механізм, якім сёння карыстаецца наш завод, — часовы. Доўга працаваць такім чынам немагчыма», — упэўнены ён.
Лукашэнка паставіў шэраг прынцыповых пытанняў. Па-першае, якой бачыцца стратэгія развіцця прадпрыемства.
«Асновы нашай эканамічнай палітыкі толькі што зацвердзілі на Усебеларускім народным сходзе. Таму калі хтосьці думае, што мы цяпер прададзім камусьці гэта прадпрыемства, прыватызаваўшы, а потым закрыем яго ці будзем вырабляць тут адны, груба кажучы, спіцы для веласіпеда, а ўсе кампетэнцыі інвестар перанясе кудысьці ў Італію, Расію ці Кітай, на гэта нават не разлічвайце», — папярэдзіў ён.
