Сёньня – роўна шэсьць гадоў, як у Менску зьнік апэратар расейскага тэлеканалу ОРТ Зьміцер Завадзскі. Раніцай 7 ліпеня 2000 году ён накіраваўся ў аэрапорт Менск-2 сустрэць з Масквы свайго калегу Павала Шарамета і быў выкрадзены. Негледзячы на тое, што па спарве Завадзкага адбыўся судовы працэс і некалькі чалавек былі аасуджаныя, знайсьці цела Завадзкі дагэтуль не ўдаецца. Па ініцыятыве Аб»яднанай Грамадзянскай партыі сёньня ў Менску ў 18.30 на Кастрычніцкай плошчы адбудзецца акцыя, прымеркаваная да трагічнай падзеі ў ліпені 2000 году.
Як паведамляе намесьнік старшыні АГП Ігар Шынкарык, акцыя рыхтуецца ў новым фармаце:
(Шынкарык: ) «Раней мы выходзілі з партрэтамі зьніклых палітыкаў. А зараз праводзім акцыю «Салідарнасьць у імя Свабоды». Мы запрашаем ня толькі родных зьніклых палітыкаў, але таксама ўсіх, чые сваякі, паплечнікі, калегі зьяўляюцца палітычнымі вязьнямі. Мы выходзім з партрэтамі ня толькі зьніклых, але й тых, каму ўжо вынесеныя прысуды ці каго яшчэ судзяць. У такім фармаце акцыя адбудзецца ўпершыню».
Яшчэ адна вестка напярэдадні акцыі ў Менску прыйшла з Нью-Йорку. Рада па правах чалавека Арганізацыі Аб»яднаных Нацыяў аднагалосна прыняла Міжнародную канвэнцыю для абароны ўсіх асобаў ад гвалтоўных зьнікненьняў.
«Гэта крок насустрач праўдзе й справядлівасьці», -- лічыць сябра й калега Зьміцера Завадзкага Павал Шарамет. Ён кажа, што сёлета ў лістападзе Генэральная Асамблея ААН разгледзіць пытаньне аб выкананьні дакумэнта міжнароднай супольнасьцю. Паводле Павала Шарамету, гэта надае ўпэўненасьць:
(Шарамет: ) «Выканаўцы гэтага злачынства будуць знойдзеныя. Тыя людзі, што аддалі злачынны загад, я ўпэўнены, будуць пакараныя. І яшчэ большую адказнасьць мусяць панесьці тыя палітыкі, той прэзыдэнт і тыя людзі, якія стварылі ў краіне такую атмасфэру і ўмовы, каб можна было скрадаць й забіваць людзей. Трагічная гісторыя са Зьміцерам, таксама як й злачынствы супраць іншых палітыкаў, -- гэта мусіць стукаць у нашых сэрцах, пакуль праўда, справядлівасьць й жыцьцё перамогуць».
Маці Зьміцера Завадзкага Вольга Рыгораўна паведаміла, што беларуская Грамадзянская ініцыятыва «Мы памятаем» накіравала ў гэтыя дні асабістую падзяку на адрас больш як 260 замежных арганізацыяў й грамадзянаў. Яны актыўна падтрымліваюць вышук Зьміцера й іншых зьніклых, -- кажа Вольга Завадзкая. Яна ж паведамляе й пра чарговы ліст з Пракуратуры Беларусі:
(Завадзкая: ) «Яны пішуць, што справа перапыненая. І ніякага іншага тлумачэньня на пытаньні: чаму і што было зроблена. Цалкам адпіска».
(Карэспандэнт: ) «Мне цяжка запытваць, але ўсё-такі: якім будзе для вас сёньняшні дзень?»
(Завадзкая: ) «У цяжкіх успамінах. Яшчэ раз пракруцяцца ў памяці жудасныя дні й ночы. Страшна ўсьведамляць, што прайшло шэсьць гадоў, але ніякіх вынікаў...»
