Суд пакінуў у сіле прысуд Кацярыне Барысевіч — 19 мая яна павінна выйсці на волю
20 красавіка Мінскі гарадскі суд разгледзеў апеляцыю на прысуд журналістцы TUT.BY Кацярыне Барысевіч. 2 сакавіка суд Маскоўскага раёна прысудзіў яе да шасці месяцаў пазбаўлення волі па справе аб «нуль праміле». Пракуратура палічыла такі прысуд занадта мяккім — і падала пратэст.
Разгляд апеляцыі быў прызначаны на 14-ю гадзіну. Пасяджэнне праходзіла ў закрытым рэжыме.
У 14.08 у залу зайшлі адвакаты журналісткі. Разгляд апеляцыі доўжыўся каля 50 хвілін. А 15-й гадзіне ў залу сталі запускаць слухачоў.
У 15.20 судовая калегія абвясціла рашэнне: пакінуць прысуд Кацярыне Барысевіч — паўгода пазбаўлення волі — у сіле. Апеляцыйныя пратэст і скаргу суд пакінуў без задавальнення.
Гэта значыць, што ўжо менш чым праз месяц Барысевіч зможа быць дома.
У працэсе Кацярына Барысевіч удзельнічала па відэасувязі з Жодзінскага СІЗА.
Крымінальную справу ў дачыненні да Кацярыны Барысевіч і Арцёма Сарокіна распачалі 19 лістапада 2020 года. Іх абвінавацілі ў разгалашэнні медычнай таямніцы, што, на думку Генпракуратуры, пацягнула цяжкія наступствы. Максімальнае пакаранне паводле гэтага артыкула — тры гады пазбаўлення волі. Нагадаем, 13 лістапада 2020 года за аўтарствам Кацярыны Барысевіч выйшаў артыкул, у якім са спасылкай на медыцынскія дакументы і каментар лекара сцвярджалася, што ў крыві Рамана Бандарэнкі не было выяўлена этанолу. Першыя асобы заяўлялі, што памерлы хлопец быў п'яны.
Каментары