Скрадзеныя людзі
Ужо шмат месяцаў разарваная сувязь паміж палітзняволенымі і іх сем'ямі. Беларусы, пазбаўленыя свабоды, не бачаць родных, прапускаюць першыя крокі сваіх дзяцей. Чалавек, з якім хацелася падзяліць жыццё, аказаўся гвалтоўна вырваны з сям'і. Замест яго з'явілася пустэча.

«Скрадзеныя людзі» — гэта своеасаблівы сямейны фотаальбом беларусаў у 2021 годзе, дакумент нашага часу.
Сям'я Ігара Лосіка
Ігар — заснавальнік самага папулярнага на той час тэлеграм-канала краіны, «Беларусь галаўнога мозга», арыштаваны 25 чэрвеня 2020 года. За гэты час ён двойчы трымаў галадоўку. Прайшло 10 месяцаў, а Лосіка так і не пачалі судзіць.

Маці, брат і сястра Віктара Акцістава
Віктар — 20-гадовы студэнт. Атрымаў 2,5 года калоніі за тое, што 10 жніўня адбіваў незнаёмага хлопца ад амапаўцаў. Пацярпелы амапавец атрымаў толькі лёгкія ранкі і драпіны на лбе.

Сям'я Івана Багдзевіча
Іван да затрымання займаўся рамонтам аўтамабіляў. Мае трох маленькіх дзяцей. Актыўна ўдзельнічаў у пошуках зніклых людзей з ПВА «Анёл». Затрыманы ў кастрычніку за ўдзел у пратэстах у сябе дома — на вачах дзяцей, жонкі і сваёй маці.

Сям'я Паўла Севярынца
Павел Севярынец — лідар хрысціянскіх дэмакратаў, адзін з заснавальнікаў «Маладога фронту». Затрыманы пасля пікета па зборы подпісаў на Камароўскім рынку 7 чэрвеня. У карцары спрабаваў парэзаць руку на знак пратэсту супраць катаванняў.

Бацькі Аляксея і Кіма Самусенкаў ды іх сабака Тагір
Актывіста «Дзеі» Кіма Самусенку затрымалі 3 лістапада. Следчы камітэт заявіў, што ён быў актыўным удзельнікам пратэстаў і датычны да ўзлому камп'ютарнай сістэмы Мінгарвыканкама. Праз два дні затрымалі і яго брата Аляксея — эканаміста ў кампаніі, якая займаецца вырабамі з пластыку.
Жонкі і дзеці братоў-палітвязняў цяпер за мяжой.

Бацька Марыі Калеснікавай
Марыя Калеснікава — каардынатарка штаба Віктара Бабарыкі, а пасля найбліжэйшая паплечніца Святланы Ціханоўскай. 7 верасня невядомыя спрабавалі вывезці Марыю ва Украіну. На мяжы яна разарвала свой пашпарт і была арыштаваная.

Брат і пляменнікі Наталлі Хершэ
Наталля 12 гадоў жыла ў Швейцарыі і мае грамадзянства гэтай краіны, але часта наведвала сваякоў у Беларусі. Была затрыманая 19 верасня на жаночым маршы. У зняволенні трымала галадоўку, калі ёй не перадавалі лісты.

Сям'я Таццяны і Змітра Канеўскіх
Таццяна — гомельская актывістка «Матчынага руху 328», была даверанай асобай Святланы Ціханоўскай. Таццяну арыштавалі за некалькі дзён да выбараў, яе сына Змітра — 28 студзеня 2021 года. Яму інкрымінуюць распальванне расавай, нацыянальнай, рэлігійнай ці іншай сацыяльнай варожасці. Пакуль не прызнаны палітвязнем.

Сям'я Змітра Галко
44-гадовага бодзібілдара арыштавалі за тое, што ён ударыў па відэакамеры чалавека ў цывільным, калі той здымаў дваровы канцэрт. Пры затрыманні мужчыну моцна збілі і даставілі ў бальніцу з чэрапна-мазгавой траўмай.

Сцяпан Латыпаў жыве адзін
Сцяпан — жыхар плошчы Перамен. Яго затрымалі за просьбу прадставіцца невядомым у масках, якія знішчалі выяву дыджэяў. Следчыя заявілі, што Сцяпан увозіў у Беларусь небяспечныя хімікаты, якімі хацеў атруціць міліцыянтаў.
Цяпер Сцяпану дапамагаюць суседзі і калегі.

Бацькі і сёстры Марыі Каленік
22-гадовая Марыя — студэнтка Беларускай дзяржаўнай акадэміі мастацтваў. Затрыманая па «справе студэнтаў» 12 лістапада 2020 года.

Сям'я Аляксея Караткова
Аляксей — распрацоўшчык стартапа MakeM. Упершыню хлопца затрымалі ў ліпені ў чарзе ля будынка КДБ, калі ён разам з іншымі спрабаваў падаць хадайніцтва аб змене меры стрымання Віктару Бабарыку. 27 жніўня Аляксея затрымалі на плошчы Незалежнасці за ўдзел у мірным сходзе каля касцёла. Па вызваленні з Жодзіна яго арыштавалі.

Маці і сёстры Анастасіі і Вікторыі Міронцавых
Дзяўчат асудзілі на 2 і 2,5 года калоніі за падзеі 10 жніўня на праспекце Пераможцаў: адна з сясцёр схапіла за локаць амапаўца, а другая — за руку. Трэцяя сястра Аляксандра з'ехала ад палітычнага пераследу ў Бразілію. На плячы ў маці сарока, прыручаная Вікторыяй.
Па стане на 20 красавіка ў Беларусі 357 палітычных зняволеных.
Пакуль у адных дома ўсе блізкія, у іншых не хапае чалавека.

Але часова.
І калісьці гэты час застанецца толькі на здымках.

Аўтар праекта — Шура Піліповіч-Сушчыц