Паводле слоў работнікаў прадпрыемства, працоўнымі днямі будуць аўторак, серада і чацвер.
Цяпер МТЗ працуе ў рэжыме чатырохдзёнкі. Ходзяць таксама чуткі, што значнай частцы завадчан будзе прапанавана ўзяць адпачынак у жніўні за свой кошт.
Такую інфармацыю ў адміністрацыі прадпрыемства, зрэшты, не пацвярджаюць. Намеснік дырэктара МТЗ Васіль Тымановіч заявіў інтэрнет‑рэсурсу «Мы»: «Чуткі чуткамі, а мы працуем у нашым рэжыме». Паводле яго слоў, выпускаецца ўся прадукцыя, на якую маюцца заказы.
Між тым, паводле звестак Белстата, запасы трактароў на 1 чэрвеня 2009 года дасягнулі 5,3 тыс. штук.
За год яны ўзраслі ў 3,1 разу. Цяпер запасы перавышаюць сярэднямесячны аб’ём вытворчасці амаль у 1,3 разу. Некалькі здымае вастрыню сітуацыі нядаўна падпісаны ў Ашхабадзе кантракт аб пастаўках 1,5 тыс. трактароў на 33 млн. долараў у Туркменістан.
На здымках — такую колькасць новенькіх трактароў «Беларусь» могуць штодзённа назіраць мінчане, якія праязджаюць праз мост на вуліцы Ваўпшасава, да якой прымыкае тэрыторыя МТЗ.