Англія — Харватыя

Лондан. Стадыён «Уэмблі», 16:00

Да гэтага зборныя Англіі і Харватыі сустракаліся восем разоў. Нягледзячы на тое, што гісторыя англійскага футбола быццам бы ярчэйшая і багацейшая, харваты практычна не саступалі суперніку — чатыры паразы, нічыя і тры перамогі, у тым ліку ў паўфінале апошняга чэмпіянату свету.

Нядзельная гульня пройдзе на галоўнай арэне еўрапейскага першынства — «Уэмблі». Пазней, 11 ліпеня, менавіта на гэтым лонданскім стадыёне, які змяшчае 90 тысяч гледачоў, адбудзецца фінал Еўра.

Аднойчы харваты ўжо перамагалі на «Уэмблі»: 21 лістапада 2007 года ў адборачным матчы да Еўра-2008. Тады Англіі патрабавалася набраць адно ачко, каб трапіць на чэмпіянат Еўропы разам з Харватыяй, якая ўжо адабралася ў фінальную частку і не вырашала ў Лондане ніякіх турнірных задач. Але англічане прымудрыліся прайграць 2:3, і замест іх на Еўра паехала Расія.

Перад маючай адбыцца гульнёй букмекеры аддаюць аднагалосную перавагу Англіі. Каэфіцыенты — 1,65 супраць 5,8. Гэта лагічна. Англія — гаспадар поля, яна мае самы дарагі на турніры склад (ацэньваецца ў €1,27 млрд) і ўваходзіць у лік галоўных фаварытаў. Практычна ўсе гульцы зборнай Англіі знаходзяцца ў выдатным па футбольных мерках веку. Сярэдні ўзрост каманды 25 гадоў і 117 дзён.

Нельга сказаць, што ў Харватыі няма шанцаў. Каманда выступіць на Еўра амаль у тым жа складзе, што тры гады таму на чэмпіянаце свету ў Расіі. Праўда, у ім не будзе аднаго з найлепшых гульцоў, паўабаронцы Івана Ракіціча. Год таму на той момант 32-гадовы футбаліст абвясціў аб сыходзе са зборнай.

Галоўны трэнер харватаў Златка Даліч імкнецца амаладзіць склад, што лагічна, бо на сусветным першынстве ў Расіі сярэдні век харватаў перавышаў 28 гадоў. Лідару каманды Луку Модрычу ў верасні споўніцца ўжо 36. Ці пакажа ён на Еўра той жа ўзровень гульні, што на сусветным першынстве? Тады Модрыч быў добры. Па выніках 2018 года ён атрымаў «Залаты мяч» — узнагароду найлепшаму футбалісту года.

У цэлым Англія — Харватыя — гэта адна з самых гучных гульняў на групавым этапе. Таму заўзятары маюць права чакаць цікавага матчу.

Аўстрыя — Паўночная Македонія

Бухарэст. Стадыён «Нацыяналь», 19:00

Зборныя Аўстрыі і Паўночнай Македоніі гулялі ў адной адборачнай групе да чэмпіянату Еўропы. І ў гасцях (4:1), і дома (2:1) выйгралі аўстрыйцы, якія і на гэты раз з'яўляюцца фаварытамі — 1,8 супраць 5,4, паводле версіі букмекераў.

Македонія выйшла ў фінальную частку чэмпіянату Еўропы ўпершыню ў гісторыі, прабіўшыся туды праз стыкавыя матчы. Аўстрыя больш вопытная — у 2008 і 2016 гадах яна ўдзельнічала ў Еўра, але з групы выйсці не змагла, набраўшы ў абодвух выпадках па адным ачку.

Улічваючы, што іншымі ўдзельнікамі групы С з'яўляюцца Нідэрланды і Украіна — каманды больш высокага ўзроўню, той, хто прайграе ў матчы Аўстрыя — Паўночная Македонія, практычна пазбавіцца шанцаў на трапленне ў плэй-оф.

Нідэрланды — Украіна

Амстэрдам. Стадыён «Ёхан Кроіф Арэна», 22:00

Нідэрланды і Украіна правядуць першы афіцыйны матч у гісторыі. Раней каманды сустракаліся толькі ў кантрольных гульнях — перамога Нідэрландаў 3:0 і нічыя 1:1.

Расклад сіл перад матчам галандцаў і ўкраінцаў з'яўляецца прыкладна такім жа, як напярэдадні сустрэчы англічан і харватаў. Нідэрланды — фаварыты (1,6 супраць 6,2), бо згуляюць на сваім полі, маюць дарагі (€607 млн — восьмае месца) склад і лічацца аднымі з галоўных прэтэндэнтаў на перамогу ў турніры.

Зрэшты, зноў жа, як і ў выпадку з Харватыяй, не варта скідаць Украіну з рахункаў. Падчас адборачнага турніру каманда апярэдзіла дзейнага чэмпіёна Еўропы Партугалію, згуляўшы ўнічыю 0:0 у гасцях і перамогшы 2:1 дома. Таксама калектыў Андрэя Шаўчэнкі апярэдзіў моцную Сербію, якая стала толькі трэцяй.

У складзе Украіны ёсць некалькі маладых і таленавітых гульцоў, а таксама некалькі моцных майстроў з вядучых еўрапейскіх чэмпіянатаў — Руслан Маліноўскі («Аталанта»), Аляксандр Зінчанка («Манчэстэр Сіці») і Андрэй Ярмоленка («Вест Хэм»). Вядома, Украіне будзе не хапаць паўабаронцы «Шахцёра» Яўгена Канаплянкі, які прапускае Еўра з-за траўмы. Але ёсць страта і ў Нідэрландаў — пашкоджанне ў нядзелю не дазволіць выйсці на поле абаронцу «Ювентуса» Матэйсу дэ Лігту.

Хочаш падзяліцца важнай інфармацыяй ананімна і канфідэнцыйна?