Чытачы «Нашай Нівы» паведамілі, што ва ўсім Магілёве не было электрычнасці і былі праблемы з вадой: сталі тралейбусы, не працавалі святлафоры і АЗС.

Аналагічныя праблемы былі ў Шклове, Бялынічах, Талачыне і Оршы, некаторых раёнах Гомеля.

Жыхары мінскай Серабранкі таксама масава паведамлялі пра перабоі з электрычнасцю.

У Наваполацку гарэлі тэхналагічныя факелы нафтахімічных заводаў.

Пазней з'явілася паведамленне МНС: «Падраздзяленні МНС выехалі па паведамленні аб пажары на тэрыторыі Лукомльскай ДРЭС. Інфармацыя будзе дапоўненая».

Адбылося ўзгаранне адной з секцый трансфарматарнай падстанцыі.

З-за пажару на Лукомльскай ДРЭС парушана электразабеспячэнне населеных пунктаў Магілёўскай і Віцебскай абласцей, паведамілі ў мінэнерга. Былі адключаныя 8 энергаблокаў ДРЭС і ўсе выходныя лініі 330 кВ.

Папярэдняя прычына пажару па версіі мінэнерга — пашкоджанне вымяральнага трансфарматара.

Па стане на 22:37 сталі з'яўляцца паведамленні пра тое, што электразабеспячэнне ў Магілёве пачало аднаўляцца.

У 23:02 ратавальнікі паведамілі, што загаранне трансфарматара напружання ТН-330 кВ (2 секцыя) на Лукомльскай ДРЭС ліквідавана. Пацярпелых няма.

Хочаш падзяліцца важнай інфармацыяй ананімна і канфідэнцыйна?