Палітычны аглядальнік Арцём Шрайбман у праграме «Ток» выказаўся на тэму, ці могуць спецслужбы забіваць праціўнікаў рэжыму за мяжой.
— Думаю, што яны здольныя аддаць такі загад. Я не ўпэўнены, што ў іх ёсць людзі, якія здольныя гэта зрабіць, свае. Але ва Украіне з гэтым, як мне здаецца, прасцей, можна наняць. Тут вельмі шмат, мяркуючы нават па расказах мясцовых людзей, што вельмі шмат ветэранаў АТА, неўладкаваных у жыцці, вельмі шмат з розных бакоў украінскага палітычнага спектру нейкіх людзей з баявым вопытам. Наогул ва Украіне, мы ведаем, забойствы журналістаў, забойствы палітыкаў, яны, на жаль, адбываліся нават, напэўна, часцей, чым у Беларусі, калі мы паглядзім па такіх знакавых прозвішчах. Ну і да таго ж ёсць Расія, якая можа з ключавымі фігурамі, калі спатрэбіцца, дапамагчы. І я б не выключаў, што беларуская ўлада да гэтага прыйдзе, на жаль. Мы сёння ўжо ў тым пункце, калі немагчыма казаць, што вось нешта за межамі. Беларуская ўлада сёння сілкуецца з эскалацыі. Яна не можа існаваць, не абвастраючы. Варыянтаў абвастрэння засталося не так і шмат. Паспрабавалі з мігрантамі, у літоўскай мяжы, окей. Яшчэ напэўна ёсць шляхі прэсінгу на еўрапейскіх дыпламатаў, такога фізічнага. Гісторыі пра тое, што некаторым дыпламатам прабівалі колы ў Мінску, яны ўжо ходзяць па дыпламатычным корпусе. І далей у нас што? Нейкія фізічныя дзеянні да ўцекачоў-дысідэнтаў, палітыкаў, апазіцыянераў.
