«Днямі сын крыху прыхварэў. Пачырванела горла. Вырашылі з жонкай, што на пару дзён пакінем яго дома. Папярэдзіў педагога ў класным чаце, але тая катэгарычна запатрабавала ад нас афіцыйную даведку ад доктара.
Маўляў, трымаць дзіця дома без даведкі — няўважная прычына пропуску. Але гэта ж нейкі здзек! — абураецца Мікалай з Віцебска. — Школа патрабуе даведку, а паліклініка просіць не вадзіць дзяцей лішні раз. Павядзеш дзіця да ўчастковага з банальным насмаркам — дадому прывядзеш з кавідам. У паліклініках жа цяпер натоўпы хворых на каранавірус пацыентаў».
Мужчына дадае, што ў мінулым годзе ў школе дзейнічалі іншыя правілы. Праз запіску класнай або заяву на імя дырэктара можна было паведаміць пра адсутнасць сына на занятках. Дазвалялася пакідаць дзіця на час да трох дзён.
«Калі не ачуняе — тады ўжо вялі да доктара і бралі даведку. Лагічна. А ў гэтым годзе, аказваецца, без даведкі нельга прапусціць ні дня? Гэта наогул дзесьці замацавана заканадаўча?» — пытаецца Мікалай.
Настаўніца: «З гэтага года сталі патрабаваць даведкі з любой нагоды»
«Раней на педсаветах да класных кіраўнікоў даносілі інфармацыю пра магчымасць трох прапушчаных дзён без даведкі. Але і тады гэта было рэкамендацыяй, дакладна не законам, — распавядае педагог пачатковых класаў адной са сталічных школ Наталля Уладзіміраўна. — З гэтага года, мяркуючы па тым, што мне распавядаюць калегі з іншых школ, сталі патрабаваць даведкі з любой нагоды. У нашай школе такога правіла няма.
Гэта значыць, што ўсё гэта — не больш як перагібы школьнай адміністрацыі. Хутчэй за ўсё корань праблемы ў «Рэкамендацыях па арганізацыі адукацыйнага працэсу ва ўмовах распаўсюджвання COVID-19». Яны складзеныя сумесна Міністэрствам аховы здароўя і Міністэрствам адукацыі і дзейнічаюць на працягу верасня-кастрычніка гэтага навучальнага года.
Але ў рэкамендацыях не пазначана, што вучань абавязаны прынесці даведку ад доктара, калі ён не быў у школе. Там напісана, што калі ў вучня тэмпература, да ўрокаў ён не дапускаецца. Распісаны таксама алгарытм дзеянняў на выпадак, калі такое дзіця прыйшло ў школу, як правільна вымяраць тэмпературу і інш.
Цікава, што ў Кодэксе аб адукацыі колькасць прапушчаных дзён не рэгламентуецца. Але што будзе, калі бацькі ўсё ж пакінуць дзіця дома на тры дні без даведкі? Ці можа прынцыповы настаўнік прызнаць гэта пропускам па няўважнай прычыне? Дзіця з-за гэтага могуць выключыць са школы?
«Выгнаць дзіця за пропускі нельга, а пакінуць на другі год яго можна толькі, калі ён не атэставаны, — адзначае настаўніца. — Пры гэтым законныя прадстаўнікі школьніка павінны праінфармаваць класнага кіраўніка аб тым, дзе і з кім вучань будзе праводзіць час падчас сваёй адсутнасці. Даведка ад доктара патрэбна ў тым выпадку, калі вучань у перыяд адсутнасці захварэў».
Юрыст: «Рашэнні адміністрацыі школы могуць насіць толькі рэкамендацыйны характар»
«Ёсць Кодэкс РБ аб шлюбе і сям’і. Па ім сям’я і законныя прадстаўнікі дзіцяці — у прыярытэце. Яны маюць права выбіраць метады, формы выхавання і адукацыі свайго дзіцяці. Простымі словамі, у сітуацыі, якая склалася, адміністрацыя школы можа толькі рэкамендаваць прынесці заявы па ўстаноўленым узоры, але не патрабаваць.
Распараджэнні і загады адміністрацый школы маюць юрыдычную сілу, але па статусе яны ніжэйшыя за законы Рэспублікі Беларусь, — каментуе юрыст Алена Салаўёва. — Жыццё і здароўе дзіцяці — галоўны прыярытэт. Разважаем так: у дзіцяці ёсць права на жыццё, здароўе і права на адукацыю.
У дадзенай сітуацыі жыццё і здароўе важнейшыя за адукацыю. Гэта значыць, што рашэнне аб працягласці каранціну кожны з бацькоў можа прымаць індывідуальна. Дыктаваць ім нейкі канкрэтны тэрмін магчымай адсутнасці ў школе незаконна».
