Як паведамляе прэс-служба Лукашэнкі, вытворчасцю прэпарату зоймецца ААТ «БелВітуніфарм». Указам прадугледжана будаўніцтва вытворчасці ў вёсцы Доўжа Віцебскай вобласці на базе рэканструкцыі ўжо існуючага аб'екта.
«БелВітуніфарм» вызначаны ў якасці найбольш перспектыўнай пляцоўкі для доследна-прамысловай вытворчасці вакцыны, зыходзячы са ступені гатоўнасці інфраструктуры, наяўнасці падрыхтаваных спецыялістаў, а таксама магчымасці наступнага развіцця біятэхналагічнага кластара.
Распрацоўка вакцыны вядзецца арганізацыямі Міністэрства аховы здароўя і Акадэміі навук. Падрыхтавана серыя прататыпнага варыянту вакцыны.
Колькі грошай плануецца выдаткаваць на арганізацыю вытворчасці, не паведамляецца. Указ прадугледжвае вызваленне тэхналагічнага абсталявання, сыравіны і матэрыялаў, якія ўвозяцца на тэрыторыю краіны для рэалізацыі інвестыцыйнага праекта, ад абкладання ўвазнымі мытнымі пошлінамі і падаткам на дадатковую вартасць.