Паводле журналіста, вядомага сваімі цеснымі кантактамі з Крамлём, інтэграцыйная гісторыя заключаецца ў тым, што перад працягам паўнамоцтваў Уладзіміру Пуціну трэба «выклікаць захапленне і шчасце» ў расіян, як ён выклікаў захапленне і шчасце, далучыўшы Крым.
«І гэтае захапленне і шчасце азначае абʼяднанне з Беларуссю», ‒ гаворыць Венедзіктаў.
«Аднаўленне імперыі. У 14-м годзе гэта быў Крым, а ў 23-24 годзе гэта будзе саюз Расіі і Беларусі, з адзіным усім, адзіным прэзідэнтам, адзінай валютай, адзіным газавым рынкам. І гэтак далей. Уласна кажучы, усё, што ён [Пуцін] зараз робіць у адносінах да Мінска, я б назваў словам «падкрадаемся».
Паводле Венедзіктава, «ліхім кавалерыйскім наскокам у снежні 2019 — студзені 2020 года не ўдалося «шугануць» беларускае кіраўніцтва».
Венедзіктаў згадаў няўдалы вопыт былога пасла Расіі ў Беларусі Міхаіла Бабіча.
«Чалавек генеральскай формы, які пачаў, у тым ліку, як мне расказвалі, у амбасадзе праводзіў сустрэчы з камандуючымі беларускімі акругамі, вайскоўцамі. То-бок ён гэтую самую ваенную эліту, магчыма, і спецслужбісцкую эліту, карміў, паіў і прывабліваў».
Тады Лукашэнка запатрабаваў ад Пуціна забраць амбасадара. «Гэта значыць кавалерыйскі наскок не атрымаўся».
Але праз «падзеі жніўня 2020 года, прэзідэнцкія выбары ў Беларусі, наступныя падзеі, перш за ўсё, супраціўленне значнай часткі беларускага народа вынікам выбараў, прывяло да таго, што Лукашэнка ўнутры аслабеў.
Але да гэтага часу РФ ужо інакш глядзела на інкарпараванне Беларусі — альбо ў склад, альбо ў агульную дзяржаву. Насамрэч, не мае значэння. Збіраем імперыю. І таму будзем падкрадвацца», — гаворыць Венедзіктаў.
Венедзіктаў таксама расказаў пра крамлёўскі рэцэпт аншлюсу:
«Не расійскае насельніцтва купляць, а беларускае насельніцтва купляць. Ну і беларускую эліту, зразумела. Кіраўніцтва войска, кіраўніцтва спецслужбаў. Гэта значыць вось гэтыя слупы, на якія абапіраецца зараз Аляксандр Лукашэнка.
Таму я думаю, што адным з гэтых сшыткаў, якія Лукашэнка вымушаны быў падпісаць, — гэта паглыбленне ваеннага супрацоўніцтва. Цяпер пойдуць сумесныя вучэнні, навучанне ў Генштабе Расійскай акадэміі і Генштабе РФ маладых беларускіх афіцэраў. Размяшчэнне нашых і гэтак далей. І вось гэта адна з тых «дарожных карт», на якую я звярнуў асобную ўвагу».
Венедзіктаў падкрэслівае, што рэсурсаў у Пуціна, каб націснуць на Лукашэнку, зараз шмат больш, чым было да жніўня 2020 года.
«Расія дабіваецца ўсяго, чаго хацела». Эксперты, чыноўнік і сілавік каментуюць падпісанне інтэграцыйных праграм
