Беларускі памежнік, які адслужыў 15 гадоў, пракамэнтаваў на просьбу «Свабоды» дзеяньні сваіх былых калегаў.
Ён лічыць, што мігранты адназначна зьяўляюцца парушальнікамі — бо знаходзяцца ў памежнай паласе.
«Паводле заканадаўства, для таго каб знаходзіцца ў памежнай паласе, трэба мець пашпарт і пропуск, які выдалі органы памежнай службы. Тут жа мы бачым, што мігранты вольна «жывуць» у памежнай паласе, паляць вогнішчы, сякуць дрэвы — і іх ніхто не чапае! У цёмны час сутак наогул нікому нельга знаходзіцца ў памежнай паласе! Гэта рабіць можна толькі ў крайнім выпадку, па рашэньні начальніка органа памежнай службы. Значыць, калі «законна», то яны знаходзяцца там выключна па рашэньні памежнага начальства», — кажа былы памежнік.
Ён лічыць, што былыя калегі, не зьвяртаючы ўвагі на парушэньні закону, больш за тое — спрыяючы такім парушэньням, зьдзяйсьняюць службовае злачынства.
«Калі нелегала ловяць у памежнай паласе, то інструкцыя стандартная: затрыманьне — пратаколы — ІЧУ — прыняцьце рашэньня па дэпартацыі. І заўсёды так было», — дадаў былы памежнік.
Ён зьвяртае ўвагу: калі мігранты сёньня ішлі па дарозе рэспубліканскага значэньня ў бок пункту пропуску — яны нічога не парушалі. Але калі яны збочылі ў лес і трапілі ў памежную паласу — сталі парушальнікамі.
«Наколькі я ведаю, памежнікі маюць загад зьверху — не затрымліваць мігрантаў, а спрыяць ім», — выказаўся суразмоўца.
Яшчэ ён заўважыў, што цяпер да «аховы» мігрантаў, ці да іх «ачапленьня», пачалі прыцягваць і вайскоўцаў тэрміновай службы.
«Яшчэ зьвярну ўвагу на такую акалічнасьць: на відэа бачна, што спальнікі ва ўсіх аднолькавыя, нават у курдаў і сырыйцаў. Гэта значыць, што была цэнтралізаваная закупка. А ў аднаго я заўважыў нават спальнік, якімі карыстаюцца памежнікі», — зазначыў былы памежнік.
Штраф, дэпартацыя, ІЧУ. Як раней абыходзіліся з тымі, хто спрабаваў прарвацца праз мяжу
