Фота depositphotos.com.
Як зразумець, ці не знаходзіцеся вы ў рызыцы праз храп? Вось асноўныя прыкметы небяспечнага сімптому.
Пачнём з таго, што важны сам характар храпу. Калі размова ідзе пра дужа гучны храп, які можна чуць, напрыклад, за закрытымі дзвярыма, на такі сімптом варта звярнуць увагу.
Яшчэ адна прыкмета абструктыўнага апноэ — павышаная стомленасць і санлівасць на працягу дня.
Часам абструктыўнае апноэ робіцца настолькі сур’ёзным, што яго прыкметы заўважаюць блізкія хворага чалавека. Напрыклад, яны не толькі чуюць храп, але і бачаць, што чалавек перастае дыхаць падчас сну, кашляе ці задыхаецца. Усё гэта — прычыны тэрмінова звярнуцца да медыкаў.
Абструктыўнае апноэ сну можа выклікаць гіпертанію. Кожны раз, калі чалавек перстае дыхаць на некалькі секунд, яго нервовая сістэма ўступае ў дзеянне і павышае крывяны ціск. У той жа час цела чалавека ў такіх умовах вырабляе гармоны стрэсу катэхаламіны, якія таксама спрыяюць павышэнню ціску праз нейкі час. Павышаны ціск сам па сабе не з’яўляецца сімптомам апноэ, але ў камбінацыі з іншымі прыкметамі гэтага разладу ён дазваляе западозрыць апноэ.
Як лішняя вага і пол уплываюць на храп
Каб выключыць апноэ, трэба таксама звяртаць увагу і на больш стабільныя характарыстыкі чалавека, што пакутуе на храп. Адна з іх — індэкс масы цела. Каб яго вылічыць, дзеляць масу цела ў кілаграмах на квадрат росту чалавека ў метрах.
Нармальным лічыцца індэкс масы цела ад 18,9 да 24,9. Людзі з атлусценнем, у якіх індэкс масы цела вышэйшы за 30, часта маюць абструктыўнае апноэ сну. Праз лішнюю вагу мяккія тканкі іх рота, языка і шыі ціснуць на дыхальныя шляхі, што часткова іх блакуе і не дае чалавеку свабодна дыхаць без храпа.
Тонус мускулаў часта пагаршаецца з узростам, прычым гэта датычыцца і мускулаў задняга паднябення і шыі. Таму, калі вам больш за 50 гадоў, вы маеце павышаную рызыку захварэць на абструктыўнае апноэ.
Тое ж самае датычыцца пола — у гісторыі з апноэ мужчыны знаходзяцца ў большай небяспецы. Магчыма, гэта звязана з тым, што мужчыны звычайна маюць больш тоўстыя языкі, чым жанчыны, а ў верхніх частках іх целаў, асабліва ў шыі, больш тлушчу. Аднак пасля менапаўзы жанчыны пачынаюць часцей хварэць на апноэ.
Як ні дзіўна, але акружнасць шыі таксама можа падказаць, ці з’яўляецца ваш храп небяспечным. Мужчыны з акружнасцю шыі, большай за 43 сантыметры, маюць павышаную рызыку абструктыўнага апноэ сну. Для жанчын адпаведная лічба складае 40,6 сантыметраў.