Былы генеральны дырэктар ААТ «Рагачоўскі малочна‑кансервавы камбінат» Міхаіл Комар прыгавораны Гомельскім абласным судом да дзевяці гадоў пазбаўлення волі з канфіскацыяй маёмасці і пазбаўленнем права займаць кіруючыя пасады тэрмінам на пяць гадоў.
Прыгавор уступіць у сілу 10 жніўня, за гэты час у абвінавачванага ёсць права на падачу касацыйнай скаргі. Прыгавор быў абвешчаны 24 ліпеня.
Як паведамілі БелаПАН у Гомельскім абласным судзе, былы кіраўнік «прызнаны вінаватым у крадзяжы шляхам злоўжывання службовымі паўнамоцтвамі пры завалоданні маёмасцю, учыненым службовай асобай з выкарыстаннем сваіх службовых паўнамоцтваў арганізаванай групай у буйным памеры» (ч. 4 арт. 210 КК). Па дадзеным артыкуле яму прызначана дзевяць гадоў пазбаўлення волі з канфіскацыяй маёмасці і пазбаўленнем права займаць кіруючыя пасады тэрмінам на пяць гадоў.
Ён таксама прызнаны вінаватым «у злоўжыванні службовымі паўнамоцтвамі, гэта значыць наўмысным, наперакор інтарэсам службы ўчыненні службовай асобай дзеянняў з выкарыстаннем сваіх службовых паўнамоцтваў» (ч.3 арт.424 КК). За гэта яму прызначана восем гадоў пазбаўлення волі з канфіскацыяй маёмасці.
Комара таксама прызналі вінаватым у незаконным набыцці і захоўванні боепрыпасаў (ч.2 арт.295 КК), за што абвінавачванаму прызначаны адзін год пазбаўлення волі без канфіскацыі.
Шляхам паглынання менш строгага пакарання больш строгім канчаткова прызначана дзевяць гадоў пазбаўлення волі з канфіскацыяй, пазбаўленнем права займаць кіруючыя пасады тэрмінам на пяць гадоў і адбываннем пакарання ў ПК узмоцненага рэжыму. Суд пастанавіў спагнаць з былога дырэктара на карысць Рагачоўскага МКК больш за 8,7 млрд. рублёў.
Крымінальную справу ў адносінах да былога кіраўніка аблсуд разглядаў з 16 лютага 2009 года.
57‑гадовы гендырэктар камбіната быў затрыманы супрацоўнікамі КДБ 30 мая 2009 года. У адносінах да кіраўніка прадпрыемства і яго сына Антона Комара, у той час генеральнага дырэктара маскоўскага прадстаўніцтва Рагачоўскага МКК, была распачата крымінальная справа.
Спецслужбы ўстанавілі, што бацька і сын, уступіўшы у змову з іншымі не ўстаноўленымі следствам асобамі, на працягу 2006—2008 гадоў кралі грашовыя сродкі прадпрыемства. Крадзеж ажыццяўляўся шляхам заключэння фіктыўных дагавораў. Праваахоўнікі дапускалі, што такім чынам было скрадзена больш за 8 млрд. беларускіх рублёў.
У маі 2008 года, калі бацька быў затрыманы, сыну ўдалося схавацца ад органаў крымінальнага пераследу. Ён быў абвешчаны ў міжнародны вышук. Спачатку 29‑гадовы мужчына хаваўся на тэрыторыі Расіі, аднак адшукаць яго ўдалося ў іспанскім Алікантэ, дзе ў лістападзе 2008 года ён быў затрыманы. Яго таксама чакае судовы разбор.
