Найбольш плацяць у ІТ, на піўзаводзе і мясакамбінаце
Традыцыйна самыя высокія заробкі ў ІТ-сферы. Тэхнічны дырэктар (Engineering manager) можа разлічваць на зарплату да сямі тысяч даляраў плюс бонусы. Да таго ж заробак прывязаны да курса даляра.
Аграпрадпрыемству з Кобрынскага раёна «Гарадзец-Агра» патрэбны дырэктар на зарплату ў 3000-4500 рублёў. Нюансы працы і патрабаванні да кандыдатаў не паведамляюцца.
«Аліварыя» шукае дырэктара дэпартамента. Зарплата — чатыры тысячы рублёў. Трэба ведаць англійскую, задача — пабудова эфектыўнага аддзела маркетынгу і кіраванне ім.
Намеснік дырэктара па вытворчасці і якасці патрэбны магілёўскаму мясакамбінату. Заробак для Беларусі вельмі высокі — ад трох тысяч рублёў, дадаткова кампенсуюць арэнду жылля.
Таксама ад трох тысяч рублёў абяцаюць дырэктару кампаніі, якая займаецца пастаўкамі будматэрыялаў і абсталявання.
Сур’ёзную зарплату прапануюць дырэктару полацкага камунальнага паліграфічнага прадпрыемства «Наследие Ф.Скорины», 2500-2600 рублёў.
Беларуска-індыйскае фармпрадпрыемства «Новалок» у Скідзелі таксама шукае дырэктара. Зарплата ад 2300 да 2500 рублёў, але ёсць нюансы: трэба свабодна валодаць рускай, англійскай і хіндзі.
Дырэктар разлікова-касавага цэнтра аднаго з банкаў можа разлічваць на 1700-2500 рублёў зарплаты.
Дырэктару крамы «Еўраопт» у Мінску прапануюць ад 1600 да 2200 рублёў. Яго намесніку — ад 1000 да 1200. Калі верыць апісаню вакансіі, абодвух чакае «цікавая і напружаная праца, высокі ўзровень адказнасці».
Кампанія «Віталюр» прапануе дырэктару сваёй крамы зарплату ад 1930 рублёў, намесніку — ад 1300. Дырэктару крамы «Дабраном» абяцаюць менш — 1600-1800 рублёў.
Дырэктара шукаюць на мінскае прадпрыемства, якое займаецца вытворчасцю тэлекамунікацыйнага абсталявання. Патрабаванні: вопыт работы на кіруючай пасадзе ў дзяржаўнай арганізацыі ад двух гадоў, свабоднае валоданне англійскай мовай. Зарплату абяцаюць ад 1500 да 2000 рублёў.
Намеснік дырэктара па жывёлагадоўлі можа зарабіць ад 1000 да 2000 рублёў. Праца — у ААТ «Тураўшчына».
Дырэктару ЖЭУ аднаго з раёнаў Мінска абяцаюць плаціць 1500 рублёў.
За кітайскую мову ад 600 да 1500
Калі чалавек ведае кітайскую мову, то можа прэтэндаваць на пасаду дырэктара ў адным з гандлёвых прадпрыемстваў. Заробак 900-1500 рублёў, акрамя кітайскай мовы, патрабуюць вопыт працы ў грамадскім харчаванні, веданне асноў эканомікі Кітая і Беларусі. Іншае ТАА таксама шукае дырэктара, які валодае кітайскай, праўда, чым займаецца кампанія, не паведамляюць. Заробак там невялікі, 600-800 рублёў.
А кандыдат, які «мае вопыт працы ў тайскім СПА-салоне і ўпэўнена валодае англійскай», можа разлічваць на пасаду намесніка дырэктара ў мінскім салоне прыгажосці. Зарплата ад 1162 да 1395 рублёў.
Арт-дырэктара неназванай установы ў Мінску (выглядае, што гэта бар ці рэстаран), які будзе весці сацсеткі, арганізоўваць прома-акцыі і выступы артыстаў, шукаюць на заробак ад 1000 рублёў.
Камунальнае жыллёвае рамонтна-эксплуатацыйнае прадпрыемства з Гомеля шукае сабе намесніка дырэктара па ідэалогіі. Плаціць будуць 900 рублёў.
Дырэктар вясковай дзіцячай школы мастацтваў можа разлічваць на заробак ад 662 да 843 рублёў. Праца — у Смаргонскім раёне.
Дырэктар вясковай школы патрабуецца на Шаркаўшчыне. Зарплата ад 694 да 765 рублёў.
Дырэктар філіяла страхавой кампаніі ў Свіслачы можа разлічваць на 725 рублёў зарплаты. Намесніку дырэктара раённай бібліятэкі там жа абяцаюць плаціць 660 рублёў.
Намеснік дырэктара па адміністрацыйна-гаспадарчай працы ў Наваполацкай школе Алімпійскага рэзерву можа разлічваць на сціплыя 611 рублёў зарплаты.
Цікавая вакансія маецца ў тэхнапарку «Вялікі камень». Там на чвэрць стаўкі шукаюць дырэктара з сур’ёзным спісам навыкаў: вопыт у сферы тэлекамунікацый на кіруючых пасадах ад 15 гадоў, вопыт кіраўніцтва ў сферы маркетынгу; прафесійныя веды ў галіне перадавых інфармацыйных тэхналогій; свабоднае валоданне англійскай і кітайскай мовамі. Зарплата ж — 600 рублёў.
Сумна вядомы музей шукае новага дырэктара
Ваўкавыскі музей імя Баграціёна шукае дырэктара. Заробак — 550 рублёў. Нагадаем, былы дырэктар гэтага музея Канстанцін Шышмакоў быў членам выбарчай камісіі ў жніўні 2020 года, адмовіўся падпісваць выніковы пратакол. А праз тыдзень пасля выбараў Шышмакоў знік, яго цела знайшлі праз некалькі дзён у лесе. СК адрапартаваў, што смерць дырэктара музея «не носіць крымінальнага характару».
А ў Гомелі шукаюць дырэктара ТАА на заробак у 460 рублёў. Чым займаецца прадпрыемства, не пішуць, але пошук выдае, што сфера дзейнасці — нарыхтоўка лесу.
На зарплату ў 450-500 рублёў у Мінску патрабуецца дырэктар, які будзе ведаць «рэцэптуры кітайскай кухні». Абавязковае і веданне кітайскай мовы «для абслугоўвання наведвальнікаў кафэ — кітайскіх грамадзян».
Кампанія, якая займаецца імпартам ў Беларусь гідраабсталявання, абяцае дырэктару зарплату ад 400 рублёў. Пры гэтым трэба мець вопыт працы ў пяць гадоў і ведаць літоўскую.