Пастанову ўрада № 991 «Аб некаторых пытаннях набыцця тавараў на тэрыторыі Рэспублікі Беларусь» падрыхтаваў адзін буйны «дзеяч» па ўказцы прэм'ер-міністра, заявіў Аляксандр Лукашэнка 6 жніўня на нарадзе па пытаннях дзейнасці органаў пракуратуры.
«Вось, да прыкладу, нядаўна выпусцілі пастанову № 991 і фактычна забаранілі суб'ектам гаспадарання гандляваць. Ды няхай кіраўнік сам вырашае, як дзейнічаць, а патрабаваць трэба за прыбытак і рэнтабельнасць! — прыводзіць словы Лукашэнкі ягоная прэс-служба. — Навошта камусьці ўказваць: з кім гандляваць, працаваць з пасрэднікамі ці не? Сталі разбірацца, хто пастанову рыхтаваў.
Аказалася, адзін дзеяч па ўказцы прэм'ер-міністра падрыхтаваў гэты дакумент, кінуў яму на стол і назаўтра паехаў у адпачынак. Спытаць нават няма з каго!»
«Так, пасрэдніцтва — гэта кепска, і мы павінны яго пазбягаць, — прадоўжыў Лукашэнка. — Але з якой мэтай? Каб цана былі ніжэйшая, а якасць — добрая. Навошта ўзнялі на дыбкі ўсю краіну? Гэта справа прыватніка, дзе і як закупляць, ён жа разумее, што гэта яго грошы, ён ніколі не купіць даражэй і з горшай якасцю. Значыць, пытанні да дзяржаўных прадпрыемстваў. Дык давайце паставім задачы, а потым праз месяц праверым, вінаватыя адкажуць. Вось і ўсё, і не трэба ніякага шуму. Інакш узнікаюць пытанні: дзе ж тая лібералізацыя эканамічнай дзейнасці, аб якой мы гаворым, дзе самастойнасць кіраўніка, калі мы яму пішам, што ў каго купіць. Няхай ён сам разбіраецца, а наша задача — даць прававую і іншую ацэнку кіраўніку, які адказвае за вытворчасць. Вось як трэба дзейнічаць, а не фронтам хадзіць па краіне».
Пастанова № 991 была прынята 28 ліпеня і адменена 4 жніўня пасля ўмяшання Лукашэнкі. Дакумент, які міністр эканомікі Мікалай Зайчанка назваў «антыкрызіснай мерай», выклікаў рэзка негатыўную рэакцыю бізнес-супольнасці.
