Рэспіраторныя маскі супраць грыпу сталі атрыбутам моды і стылю
Сусветная эпідэмія грыпу «падклала свінню» медычным арганізацыям, але дызайнерам яна падарыла прорву творчых ідэй і магчымасцяў для іх рэалізацыі.
Галоўны санітарны лекар Расіі Генадзь Анішчанка пасля матчу Расія‑Славенія, на якім у масках былі адзінкі, параіў увесці моду на маскі. «Лічу, што трэба ўводзіць моду на нашэнне мэдыцынскіх павязак, асабліва сярод моладзі. Трэба, каб, напрыклад, Юдашкін, Зайцаў прыдумалі новы дызайн масак», —заклікаў дызайнераў галоўны санурач.
Заяву Анішчанкі апярэдзіла расійская дызайнерка Маша Цыгаль. Яшчэ раней яна распрацавала ярка‑ружовую маску з банцікамі. У вытворчасць таксама запусцілі маскі са смайламі, брутальныя чорныя маскі ды іншыя. Дарэчы, нажывацца на неабходнасці людзей у гэтым аксэсуары маладая дызайнерка не збіраецца — маска каштуе ўсяго 100 рублёў.
 Маша Цыгаль заклікала ўсіх самім распрацоўваць дызайн павязак |
Але першаадкрывальнікамі у гэтай галіне былі ўсё ж дызайнеры японскія. Яшчэ з часоў «птушынага» грыпа японскія медыцынскія маскі Get Well Soon сталі сапраўдным хітом. Маскі ўяўляюць сабой павязкі з марлі і баваўнянай тканіны, на якую нанесены прынт. Звычайна гэта малюнак жывёлаў або твар гейшы.
 Самыя папулярныя з гэтай серыі — zipper masks з замочкам у раёне вуснаў |
Іншы дызайн масак сёлета ў красавіку распрацаваў японскі дызайнер Ёрыка Ёшыда. Серыя эскізаў была прымеркаваная да эпідэміі «свінога грыпу». Яны маюць не толькі адметны дызайн, але і крой. Нос і падбародак закрываюць завостраныя канцы. На масках звычайна адлюстраваны буйны нос і рот на тэматычным фоне.
 Такую маску можна было прымерыць і на Хэлоўін |
Дызайнер Шэры Сайраф, прадавец кампаніі Etsy, сваім дызайнам маскі даказала, што і падчас грыпу ёсць месца какецтву. Яна распрацавала лінію масак ад свінога грыпу для модніц. Сярод дызайнерскіх вырашэнняў ёсць карункавыя маскі і маскі ў гарошак.
 Мода на такія аксэсуары можа застацца і пасля сканчэння эпідэміі |
Сусветнавядомы Доктар Хаўс таксама спрычыніўся да дызайна медыцынскіх масак. На сайце Магазін Доктара Хауса, які займаецца продажам атрыбутаў амерыканскага серыяла, нядаўна з’явіліся і рэспіраторныя маскі. На іх нанесеныя персанажы фільма, цытаты і розныя пацешныя малюнкі. Такую дызайнерскую маску могуць атрымаць поштай і беларускія фанаты Хаўса.
 Абазваць усіх ідыётамі каштуе ўсяго 15 400 рублёў |
Беларускія дызайнеры ж пакуль спяць у шапку. Але гэта не замінае самім распрацаваць дызайн для сваёй маскі. Для гэтага патрабуецца толькі марля, нажніцы, фарба і троху фантазіі.
