Карыстальнікі найпапулярнейшага расійскага пашуковіка «Яндэкс», у якіх слушна выстаўленыя рэгіянальныя налады, могуць бачыць галоўную старонку партала цяпер па-беларуску. Раней Яндэкс меў толькі расійскую і ўкраінскую версіі. Простая спасылка — http://www.yandex.ru/?lang=by.
У яндэксаўскай пошце выбар пакуль па-ранейшаму з дзвюх моў — украінскай і рускай.
З разынак лакалізацыі — слоўцы кшталту «мапа», «малюначкі», «лісты», з памылак — «пробкі».
Да ўсяго Яндэкс не паленаваўся распрацаваць адмысловыя тэмы афармлення: з бусламі, якія ляцяць над плошчай Перамогі, ля якой пасвяцца зубры; і з рушніком з нацыянальным арнаментам па краях і з полем пошуку пасярэдзіне.
Вынікі пошуку Яндэкс можа адфільтраваць так, каб у іх была толькі беларуская мова.
Што праўда, бадай што любая спасылка пакуль вядзе на рускую ці ўкраінскую старонкі.
У навінах і блогах Яндэкса пакуль абвестак ці каментароў адносна запуску беларускамоўнай версіі адшукаць не ўдалося.